Փաստ ինֆո

Հին Երևան թաղամասում /նախագծի հեղինակ՝ ճարտարապետ Լևոն Վարդանյան/ այս օրերին լայն թափով վերականգնվում է ճարտարապետ Վասիլի Միրզոյանի 20-րդ դարի սկզբին նախագծած Եկամտաբեր տունը /նախկինում գտնվել է Աբովյան և Ամիրյան փողոցների խաչմերուկում/։ Շենքի առաջին հարկն ամբողջ երկայնքով նախատեսված է որպես խանութներ՝ ճակատի վրա՝ մեծ ապակե ցուցափեղկերով:

Բակի ճակատի երկարությամբ 2-րդ հարկի մակարդակով բաց պատշգամբասրահներ են, իսկ գլխավոր ճակատի երկրորդ հարկի որմնասյուները հարստացված են կանացի որմնաքանդակներով:

Ճակատը երեսապատված է երևանյան սև և նարնջագույն տուֆով:

Հին երևան թաղամասի ՖԲ էջից տեղեկանում ենք, որ վերականգնված Եկամտաբեր տան բնակելի, հասարակական և առևտրային տարածքները հիմնականում վաճառված են:

Հիշեցնենք, որ Հին Երևան թաղամասը, որ գտնվում է Գլխավոր պողոտայի տարածքում՝ Աբովյան, Փ. Բուզանդ, Ե. Կողբացի և Արամի փողոցներով սահմանափակվող հատվածում, ընդգրկում է շուրջ 1.85 հա մակերեսով տարածք:

Մայրաքաղաքի այս հատվածում վերականգնվում է 19-րդ դարավերջի և 20-րդ դարասկզբի Երևանի կենտրոնից մի թաղամաս՝ դարձնելով այն զբոսաշրջային հետիոտնային գոտի: Տարածքում պահպանվել են բնակելի տների ճարտարապետությունը ներկայացնող 14 հուշարձան-շենքեր, որոնց գումարվել են նաև վերջին 2 տասնամյակում ապամոնտաժված այլ պատմական հուշարձան-շենքեր։

Հին Երևան թաղամասի տարածքում նախատեսվում են կառուցել հարմարավետ ցուցասրահներ, սրճարաններ, ռեստորաններ, ինչպես նաև՝ բնակելի տարածքներ, որոնք կարելի է գնել կամ վարձակալել:

Այժմ կառուցման փուլում է նաև Միրզոյան եղբայրների տունը /նախկինում՝ Ամիրյան 16 հասցեում/:

Նախագծում ներդաշնակորեն զուգակցված են հին և նոր ձևեր, որ ներառում են երևանյաններքին բակեր, փայտե նախշազարդ կամարաձև բաց սրահներ, վերտիկալ կանաչապատում, ապակեպատ ժամանակակից ծավալներ և այլն:

Հին Երևան թաղամասի վերականգնման արդեն երկու տասնամյակը բոլորող պատմությունը, հուսանք շուտով պատմություն կդառնա, իսկ մայրաքաղաքը կհարստանա գրավիչ ու կոլորիտային միջավայրով:

Աղբյուր` Փաստինֆո