Փաստ ինֆո

«Առաջին իսկ օրվանից ասված էր եւ «Էլարդ» -ն էլ է ասում, որ ելակետային տվյալները սխալ են, իրենք ոչ մի նորմալ տվյալ չեն ներկայացրել։ Սա նոր բան չէ»,- «Փաստինֆո»-ի հետ զրույցում ասաց բնապահպան-իրավաբան Նազելի Վարդանյանը՝ անդրադառնալով Ամուլսարի հարցով վարչապետ Նիկոլ Փաշինյանի գլխավորությամբ կառավարությունում տեղի ունեցած խորհրդակցությանը։

Հիշեցնենք, որ պաշտոնական հաղորդագրության համաձայն, Ամուլսարի հարցով կառավարությունում տեղի ունեցած խորհրդակցությանը Շրջակա միջավայրի նախարար Էրիկ Գրիգորյանն ամփոփ ներկայացրել է ընդհանուր վիճակը և նշել, որ մի շարք ուղղություններով ներկայացված ելակետային տվյալները ճշգրիտ չեն եղել: Ըստ հաղորդագրության, հարցի առնչությամբ ծավալվել է մտքերի փոխանակություն, արծարծվել են Ամուլսարի ծրագրի՝ Շրջակա միջավայրի վրա ազդեցության նոր գնահատում (ՇՄԱԳ) իրականացնելու ընթացակարգերին վերաբերող հարցեր։

Ավելի վաղ ՀՀ վարչապետ Նիկոլ Փաշինյանը հայտնել էր, որ կառավարության աշխատակազմը «Էլարդ»-ի եզրակացությունը ուղարկել է Շրջակա միջավայրի նախարարություն՝ պարզելու արդյո՞ք եզրակացության մեջ կան տվյալներ, որոնք Հայաստանի օրենսդրության համաձայն Ամուլսարի հանքի շահագործման համար Շրջակա միջավայրի ազդեցության նոր գնահատում իրականացնելու անհրաժեշտություն են առաջացնում, իսկ Շրջակա միջավայրի նախարարությունից հայտնել էին, որ եզրակացությունը նախարարությունը մինչեւ սեպտեմբերի 4-ը կներկայացնի ՀՀ վարչապետի աշխատակազմ։
Նազելի Վարդանյանի խոսքով, ըստ ամենայնի այդ եզրակացության ուշացումը պայմանավորված է նրանով, որ Շրջակա միջավայրի նախարարությունը դիմել է ակադեմիական ինստիտուտներին եւ մեկ օր ժամանակ տվել նրանց. «Այդ ինստիտուտների մեծ մասն ասել է, որ մեկ օրում հնարավոր չէ ուսումնասիրություն անել եւ եզրակացության գալ։ Երեւի դրա հետ կապված է այս ուշացումը»։

Նազելի Վարդանյանի խոսքով, ըստ ամենայնի, կառավարությունում սխալ խորհրդատուներ կան, որոնք այսպես պտտեցնում են հարցը։ «ՀՀ օրենսդրությունը միանշանակ սահմանում է, որ իրենց գործունեությունն արգելված է՝ ՇՄԱԳ եւ փորձաքննության մասին օրենքի համաձայն, Բնապահպանական եւ ընդերքի տեսչական մարմնի որոշման համաձայն, որը ակտ է կազմել, վարչական վարույթ սկսել եւ արգելել է գործունեություն ծավալել /«Լիդիան Արմենիա»-ին .խմբ/։ Քրեական գործ է հարուցվել, այսինքն մի քանի հիմքեր կան եւ հիմա ոչ ոք չի կարող թույլ տալ, որ իրենք այստեղ գործունեություն ծավալեն»։

Փաստաբանի խոսքով, նման թույլտվությունը օրենքի կոպիտ խախտում կլինի. «Ինչո՞ւ են այս ու այն կողմ ընկած, ին՞չ են ուզում անել, ես չեմ հասկանում»։

Նազելի Վարդանյանի խոսքով «Էլարդ»-ի «իրականացրած ուսումնասիրությունը ընդհանրապես ՇՄԱԳ-ի հետ կապ չուներ եւ փորձաքննություն չէր։

«Եթե նույնիսկ դա փորձաքննություն լիներ ու ամբողջ տվյալները ճիշտ լինեին, միեւնույնն է, մեր օրենսդրության համաձայն , դա բավարար հիմք չէր լինի , Ամուլսարի հարցում վերջնական եզրակացության գալու համար, որովհետեւ լիազոր պետական մարմինը Շրջակա միջավայրի նախարարությունն է, այսինքն, նախարարությունը կարող է փորձաքննական եզրակացություն տալ, բայց հարցը այլ կերպ պետք է դրվի՝ ոչ թե ՇՄԱԳ պետք է, թե՞ ոչ, այլ՝ կարո՞ղ են արդյոք իրենք այստեղ գործունեություն ծավալել, թե ոչ։ Ես 2 շաբաթ շարունակ ամեն օր այդ մասին խոսում եմ՝ չեն կարող, որովհետեւ մեր օրենսդրությունը թույլ չի տալիս։ Թե հետո իրենք նոր ՇՄԱԳ կներկայացնեն, նոր փորձաքննություն կլինի, դա իրենց գործն է, մենք այդ դաշտ չպետք է մտնենք»,-եզրափակեց Նազելի Վարդանյանը»։

Աղբյուր` Փաստինֆո