Փաստ ինֆո

Մինչև չլուծվի հանրային սննդի կետերում և իրացման ցանցերում սննդամթերքի անվտանգության կառավարման համակարգերի պարտադիր ներկրման պահանջը, սննդային անվտանգության խնդիրը չի լուծվի։ Այս դեպքում մենք պարբերաբար կբախվենք նույն խնդիրներին։

Այսօր նման հայտարարությամբ է հանդես եկել սննդագետ Դավիթ Պիպոյանը։ Անդրադառնալով՝ մսամթերքի անվտանգության և հիվանդ կենդանիների մսի շահագործմանը, Պիպոյանը նշեց, որ, եթե չեն պահպանվում կենդանիների համարակալման, համապատասխան փաստաթղթերի վերահսկման և մի շարք այլ պարտադիր կանոններ, ապա որևէ մեկը չի կարող երաշխավորել, որ այդ մսամթերքը զերծ է լինելու խնդիրներից։ Ինչ վերաբերում է փողոցային առևտրին, ապա Դավիթ Պիպոյանը ևս մեկ անգամ նշեց, որ լուծումը պետք է լինի համակարգային։ Նրա հավաստմամբ՝ մինչև համակարգային չկարգավորվի բիզնես օպերատորների պատասխանատվության ինստիտուտը, որևէ փոփոխություն չի լինի։

Սպառողի տեսանկյունից՝ փողոցային առևտուրը կշարունակի ունենալ պահանջարկ, քանի որ որևէ երաշխիք չկա, որ սուպերմարկետներում վաճառվող պտուղ-բանջարեղենն ավելի անվտանգ է, քան փողոցում վաճառվող ապրանքը։ «Հարցը միայն տաք տեղ դրված ձմերուկը չէ. Պարարտանյութերի քանակները, թունաքիմիկատների մնացորդները, ծանր մետաղների մնացորդները։ Մարդը տարրական հարց է տալիս՝ ինձ տեղ ասեք, որտեղից գնամ և լաբորատոր վերահսկողության ենթարկված թարմ պտուղ-բանջարեղեն վերցնեմ։ 

Ասում են՝ չկա, իսկ նա ասում ՝ դե որ էդպես է փողոցից էժան առնեմ»,- ասուլիսում նշեց սննդագետը։ Նման դեպքերում նախապատվությունը տրվում է էժան տարբերակին, քանի որ անվտանգության տեսանկյունից և՛ փողոցից գնված ապրանքը, և՛ մեծածախ խանութներից գնված սնունդը կարող են լինել նույնչափ վտանգավոր։

Դավիթ Պիպոյանը կարծում է, որ սննդի անվտանգության ավելի խիստ վերահսկողությունը չի իրականացվում, պատճառաբանվում է, թգ պետությունը չի ցանկանում խոչընդոտել բիզնեսին։ Սակայն Պիպոյանը նաև նշում է, որ, եթե խոսքը վերաբերում է հակածխախոտային օրենքին, ապա նույն ռեստորանային բիզնեսին կարող են խոչընդոտել։ Նրա խոսքով՝ պատճառն այն է, որ մեր երկրում անձերն են որոշում կայացնում։

Հեղինակ` Իզաբել Սահակյան