Փաստ ինֆո

ԲԴԽ-ն կոչված է ապահովել դատական իշխանության և դատավորի անկախությունը: Այնպես չէ, որ ամեն գնով պետք է պաշտպանել դատավորին,- այսօր տեղի ունեցած մամուլի ասուլիսում հայտարարել է Բարձրագույն դատական խորհրդի նախագահ Ռուբեն Վարդազարյանը՝ պատասխանելով հարցին, թե ինչու ԲԴԽ-ն չկանգնեց ՀՀ երկրորդ նախագահ Ռոբերտ Քոչարյանի գործը քննող Դավիթ Գրիգորյանի կողքին, երբ նրա նկատմամբ քրեական հետապնդում էր իրականացվում։ Վերջինիս փոխանցմամբ՝ բավարար հիմքեր են ներկայացվել ԲԴԽ-ին, և ԲԴԽ-ն թույլատրել է քրեական հետապնդում իրականացնել, իսկ Դավիթ Գրիգորյանի լիազորությունները օրենքի ուժով կասեցված են:

Ռ.Վարդազարյանը նշեց, որ Դավիթ Գրիգորյանի հայտնած տվյալները, որ քննչական գործողության ժամանակ կնիքվել է քննիչի կողմից իր աշխատասենյակի դուռը հավաստի են համարվել եւ այդ մասով դիմել են ՀՔԾ-ին։

ԲԴԽ նախագահը չհամաձայնեց այն գնահատականների հետ, թե ԲԴԽ ներկայիս կազմը իշխանություններին հարմար է։
«Անհասկանալի է հնչող «իշխանություններին հարմար ԲԴԽ» եզրույթը, քանի որ ԲԴԽ գործառույթները կարգավորվում են օրենքով», - ասաց ԲԴԽ նախագահ Ռուբեն Վարդազարյանը:

Նա հավաստիացրեց, որ բարձրագույն դատական խորհուրդը այսուհետ լինելու է չափազանց պարզ ու թափանցիկ և ցանկացած պահի պատրաստ է պատասխանել բոլոր լրագրողների հարցերին:

«ԲԴԽ-ում աշխատանքները ընթանում են բավական դրական և կառուցողական մթնոլորտում, անդամները բոլորը պատրաստ են աշխատել և իրենց կարողությունները ներդնել հանուն ՀՀ-ի: Ծանրաբեռնված աշխատանքներ են, գրեթե ամեն օր ունենում ենք քննարկումներ:

Աղբյուր` Փաստինֆո