Փաստ ինֆո

Երկրի և անհատի համար բարդ, ծանր ու միևնույն ժամանակ՝ սարսափելի անլուրջ ժամանակներում ենք ապրում:

Ակնհայտ և սողացող արտաքին մարտահրավերները մի կողմից, երկրի ներքին պառակտված վիճակը մյուս, արժեքային համակարգում ընթացող ստորջրյա-դեգրադացիոն գործընթացներ էլ կան, որ գիտակից անհատին բարոյահոգեբանական անկումնային, պատային իրավիճակների առջև են կանգնեցնում:

Այս համատեքստում հետազոտելու բավական հետաքրքիր տիրույթ են սոցիալական ցանցերը, հատկապես՝ ֆեյսբուքը, քանի որ եթե նախկինում, առնվազն՝ երկու-երեք տարի առաջ այն լուրջ, մասնագիտական քննարկումներ ծավալելու հարթակ էր, որտեղ ազատորեն կարող էին բանավիճել և՛ իշխանական, և՛ ընդդիմադիր, և մասնագիտական շրջանակները՝ հաճախ նաև՝ ընդհանուր հայտարարի գալով, ինչ-որ դրական ու լավ մոտիվացիայի հիմք դառնալով, այսօր այն ուղղակի վերածվել է ֆեյք-լաբորատորիայի: Եվ ստացվում է, որ բացարձակ հնարավոր չէ սոցցանցերում քաղաքակիրթ բանավեճ ծավալել , թեկուզ պարզապես՝ փաստական, տեղեկատվական բնույթի խոսք փոխանցել: Հանկարծ ու կարող է շուկայի ճանճի պես հայտնվել մի ֆեյք և մխտռել տարածքն իր շեղված հոգու նույնքան շեղված մտքով …

Այսինքն, ֆեյսբուքյան տարածքը զուտ ընկերային-բարեկամական-լուսանկարային շփումներից զատ, որը կոնկրետ լսարանի և ընկերների, հարազատների հայտնի կազմ է ենթադրում, մնացած բոլոր դեպքերում թիրախավորվման, հայհոյանքի տարափի, հակահիգիենիկ լեքսիկոնի ենթակա է:

Ավելին, ֆեյք-լաբորատորիան այնպիսի հրեշավոր կերպարներ է բուծում, որոնք հմտացել են արդեն անեծքների և հայհոյանքների մեջ: Բայց ֆեյքերից ու նրանց հայհոյախոսությունից անդին ֆեյսբուքում մեկ այլ, ավելի վտանգավոր տիրույթ կա, ընդ որում, այն մեր օրերի երիտասարդներն են հիմնականում կառավարում: Այդ երիտասարդների շրջանում, իսկապես, կարելի է հայտնաբերել նաև այնպիսիներին, որոնց վերաբերյալ շատ տիպական էր Վազգեն Մանուկյանի մի խոսքը՝ « Ինչ-որ նոր տեսակի մարդիկ են աճել, որոնց ես երբեք չեմ հանդիպել իմ կյանքում»:

Այդ մարդիկ զուգահեռ աշխարհում են երևի ապրել, քանի որ նրանց համար մասնագիտական համերաշխություն, մասնագիտական էթիկա և լայնախոհություն, մտքի ազատություն, տղամարդկային կեցվածք և գալանտություն, բարոյականություն երևույթները չլսված բաներ են, քանի որ նրանց առաջ մղողը ոչ թե հանուն, այլ՝ ընդդեմ սևեռումներն են: Դրա համար նրանք՝ այդ չնչին ու գծուծ-խծուծները հետևում և հետապնդում են ազատ մարդկանց:

Մի տեսակ ինքնակամ գործ- սարքող, գործ-տվող ջահելներ բուծեց այսպես կոչված՝ «սիրո և հանդուրժողականության», թավշյա հեղափոխությունը: Այ սա է, որ փողի դիմաց հայհոյող ու անիծող ֆեյքերից ահավոր է: Եվ այս դեպքում էլ ես երևույթի մասին եմ խոսում՝ իր երիտասարդությունը կամավոր դեգրադացիայի ենթարկող անհատի:

Ընդհանրապես, սոցցանցերում խոսքը, խոսքի մոտիվացիաներն ուսումնասիրելու, դրանք հետազոտության առարկա դարձնելու լուրջ խնդիր կա:
Խնդիր կա խոսելու, բարձրաձայնելու այն բոլոր նվաստ ու նողկալի մոտիվների մասին, որոնք ոչ միայն ակնառու են, այլև՝ տողատակերում են:

Հեղինակ` Անահիտ Եսայան