Փաստ ինֆո

«Ես կարծում եմ, որ Հայաստանի  իշխանությունը պետք է անհապաղ հայտարարությամբ հանդես գա՝ կամ հաստատի կամ հերքի այդ տեղեկությունը, որովհետեւ այն  իրականում կարող է լուրջ խնդիր դառնալ հայ-ռուսական հարաբերություններում։ Խնդիրները շատ են, դա կարող է դառնալ հերթականը»,- «Փաստինֆո»-ի հետ զրույցում ասաց  «Մեկ Հայաստան» կուսակցության ղեկավար Արթուր Ղազինյանը՝ անդրադառնալով ռուս ընդդիմադիր, հասարակական-քաղաքական գործիչ Վիտալի Շիշկինին փախստականի կարգավիճակ տալու վերաբերյալ տեղեկությանը։

Հիշեցնենք, որ ռուս քաղաքական գործիչն իր ֆեյսբուքյան էջի միջոցով  շնորհակալություն է հայտնել Հայաստանին՝ գրելով. «Շնորհակալ եմ Հայաստանին՝ ինձ՝ Ռուսաստանի կողմից քաղաքական պատճառներով հետապնդվող քաղաքական գործչիս փախստականի կարգավիճակ տրամադրելու համար»։

 -Պարոն Ղազինյան, եթե հաստատվի, որ տեղեկությունն իրականությանը համապատասխանում է, սա ինչպե՞ս կազդի հայ-ռուսական հարաբերությունների վրա։

-Քանի որ այդ հարցի վերաբերյալ դեռեւս պաշտոնական ոչ հաստատում եւ ոչ էլ հերքում կա, կարելի է միայն  դատողություններ անել՝ առկա տեղեկատվության  եւ այն տեղեկությունների հիման վրա, թե ով է այդ սուբյեկտը, որը շնորհակալություն է հայտնում  Հայաստանին՝ իրեն ապաստան տրամադրելու համար, եւ դա կապել հայ-ռուսական հարաբերություններում առկա խնդիրների հետ։ Բավականին մտահոգիչ է, եթե  սա Հայաստանի իշխանության պատասխանն է Ռուսաստանի իշխանություններին՝ Միհրան Պողոսյանին ժամանակավոր կացության ակտի տրամադրման համար։ Ռուսաստանի  հետ նման գոծելաոճը չի խրախուսվում եւ բավականին խնդիրներ է պարունակում Հայաստանի ներքին ու արտաքին անվտանգության համար։

- Ուշագրավ է, որ տեղեկությունը շրջանառվեց ՌԴ նախագահ Վլադիմիր Պուտինի՝ հոկտեմբերին սպասվող այցից առաջ։

-Պուտինի այցի մասին՝ որպես հաստատված հանգամանք, դեռ վաղ է խոսել, կարծես թե ինչ-որ պրոցեսներ են ընթանում, որոնք կարող են նաեւ առիթ դառնալ այդ  այցը չեղարկելու։ Այդ մասին արդեն խոսում են մերձկրեմլյան փորձագետները։ Կա նաեւ երկրորդ նախագահի՝ դեռեւս բանտում  գտնվելու հանգամանքը։ Նրա ծննդյանն օրվա առիթով Պուտինի շնորհավորանքը եւս դրա արտահայտությունն է.կարծես, թե Ռուսաստանը չի կարողանում մարսել այդ իրողությունը։ Եվ, եթե այս նորությունը հաստատվի, դա դեմարշ կլինի Ռուսաստանի դեմ, իսկ առհասարակ, հայ-ռուսական հարաբերություններ իրենց պատմության ընթացքում խորագույն ճգնաժամն են ապրում։

-Եթե տեղեկությունը հաստատվի, արդյո՞ք Հայաստանի իշխանությունների այդ քայլը կարող է նաեւ Արեւմուտքին սիրաշահելու նպատակ հետապնդել եւ արդյո՞ք այն  տեղավորվում է   «Նուվել Դաղմենի»-ին տված հարցազրույցում  Փաշինյանի նշած նշված մանեւրների մեջ։

-Եթե իր կարծիքով նեոֆաշիստին Հայաստանում քաղաքական  ապաստան տրամադրելը համարվում է փոխլրացնող կամ մանեւրի փորձ, ապա ես ցավում եմ, որ այդքան  ցածր է ընկալումը եւ այդքան ոչ պրոֆեսիոնալ է մոտեցումը արտաքին քաղաքականության եւ արտաքին քաղաքական  հզորագույն կենտրոնների հետ աշխատելու առումով։ Սա բացարձակապես ոչ թե մանեւրի, այլ երկկողմանի լրացուցիչ ռիսկերի գեներացման քայլ է՝ կրկնում եմ, եթե դա իրականում հաստատվի, բայց նաեւ փաստ է, որ մենք ունենք արտաքին քաղաքականության խորը ճգնաժամ։ Իշխանությունը չկարողացավ կողմնորոշվել արտաքին  քաղաքական հարաբերությունների ոլորտում։ Նախ` հայտարարվեց, որ  հայ-ռուսական հարաբերությունները փայլուն են, բայց ունենք բազմաթիվ խնդիրներ, ԱՄՆ-ի հետ  եւս չի հաստատվում որեւէ լուրջ համագործակցություն։ Նույնիսկ արտաքին գործերի նախարարը չի կարողանում հանդիպել ԱՄՆ-ի իր գործընկերոջ հետ, չի էլ քննարկվում Փաշինյանի ԱՄՆ կատարելիք այցի ընթացքում որեւէ բարձր հանդիպում։ Ակնհայտ է, որ Փաշինյանի գործընկերները ոչ թե ԱՄՆ-ի իշխող Հանրապետական կուսակցության ներկայացուցիչներն են, այլ ընդդիմադիր Դեմոկրատները։ Այսօրվա իշխանությունը գործընկերություն է հաստատել միայն ԱՄՆ ընդդիմության հետ, ինչի հետեւությունները թողնում եմ Ձեզ։

Աղբյուր` Փաստինֆո