Փաստ ինֆո

Գյումրիում երեխային սպանելու կասկածանքով օրերս ձերբակալված կնոջը մեղադրանք է առաջադրվել: Այս մասին «Փաստինֆո»-ն տեղեկացավ Դատախազության հանրային կապերի բաժնի պետ Արեւիկ Խաչատրյանից:

Վերջինիս խոսքով՝ մեղադրանքն  առաջադրվել է ՀՀ ՔՕ-ի 104-րդ հոդվածի 1-ին մասով, այն է՝  ապօրինաբար մեկ ուրիշին դիտավորությամբ կյանքից զրկելը:

Խաչատրյանը հայտնեց նաեւ, որ կնոջ նկատմամբ որպես խափանման միջոց է ընտրվել կալանավորումը:

«Փաստինֆո»-ն  ավելի վաղ հայտնել է, որ 2019 թվականի օգոստոսի 31-ին Գյումրու աղբանոցում հայտնաբերվել էր երեխայի դի՝ կպչուն ժապավենով կապված և կիսաշրջազգեստը պարանոցին փաթաթված վիճակում: Քննչական կոմիտեն հայտարարել էր, որ դեպքի առթիվ ՀՀ քննչական կոմիտեի Շիրակի մարզային քննչական վարչությունում հարուցվել էր քրեական գործ՝ ՀՀ քրեական օրենսգրքի 104-րդ հոդվածի 1-ին մասով:

Նախաքննությամբ պարզվել էր, որ 2019 թվականի օգոստոսի 30-ին՝ ժամը 23:30-ից 24:00-ն ընկած ժամանակահատվածում, 20-ամյա կինը ապօրինաբար մանկահասակ դստերը՝ 2018թ. ծնված երեխային, կյանքից զրկելու  դիտավորությամբ, իր բնակարանում կպչուն ժապավենով կապել է նրա ձեռքերն ու ոտքերը, բերանին փաթաթել կիսաշրջազգեստ, որից հետո երեխային բնակարանից տեղափոխել և դրել է մոտակայքում գտնվող աղբարկղերից մեկի մեջ և աղբով փակել նրան, ինչի հետևանքով վերջինս մահացել է:

Հեղինակ` Միլենա Խաչիկյան