Փաստ ինֆո

«Այսօրվա ասուլիսն ամբողջությամբ չկայացավ մի հետաքրքիր շոուի կամ շնորհանդեսի պատճառով։ Պարզապես չէի կարող այդ լարված մթնոլորտում կենտրոնանալ լրագրողների հարցերի վրա, դրա համար որոշեցի դադարեցնել այն»,-այսօր ֆեյսբուքյան ուղիղ եթերում ասել է ՀՀ Առողջապահության նախարար Արսեն Թորոսյանը` անդրադառնալով իր ասուլիսի ժամանակ տեղի ունեցած միջադեպին։

Հիշեցնենք, որ այսօր Արսեն Թորոսյանի մամուլի ասուլիսի ժամանակ ուշագրավ միջադեպ տեղի ունեցավ. ուռուցքաբան, արյունաբան, «Ժպիտների քաղաք» հիմնադրամի հոգաբարձուների խորհրդի անդամ, Արսեն Թորոսյանի նախկին խորհրդական Գևորգ Թամամյանը մտավ ասուլիսի դահլիճ և ցանկացավ հարցեր ուղղել նախարարին, Արսեն Թորոսյանն անակնկալ ձևով ընդհատեց այն ու փախուստի դիմեց սրահից։
Թորոսյանը կարծում է, որ Թամամյանի՝ իր ասուլիսին գալը շոու էր։

«Այս թատերականացված միջոցառումները Գևորգ Թամամյանի անձնական նախաձեռնությունները չեն, և նա ընդամենը դեմքն է այդ նախաձեռնությունների, դրանք կազմակերպված են Երևանի պետական բժշկական համալսարանի ռեկտորի՝ Արմեն Մուրադյանի կողմից, ով իր պաշտոնը ժառանգություն կամ նվեր էր ստացել նախկին իշխանություններից և սարսափած է, որ հիմա կարող է կորցնել»,-նշել է Թորոսյանը։

Առողջապահության նախարարը պատմել է, որ այդ ամենն սկսվել է մոտ մեկ տարի առաջ, երբ ԵՊԲՀ խորհրդի կազմը փոխելու և նախկին իշխանությունների ներկայացուցիչներին հեռացնելու ցանկություն կար։

«Այդ ժամանակվանից սկսվեց արշավն իմ դեմ, հիմնականում օրաթերթերից մեկի միջոցով, որը վատ իմաստով փաստացի դարձել էր ԵՊԲՀ ռեկտորի խոսափողը և եթե մոնիթորինգ անենք առնվազն երկու օրը մեկ, եթե ոչ ամեն օր, իմ մասին չակերտներով հոդված էր տպվում և դա մինչ օրս շարունակվում է»,-ասել է Թորոսյանը։

Առողջապահության նախարարն իր ուղիղ եթերում անդրադարձել է նաև Թամամյանի հայտարարությանը, թե նախարարությունը պետպատվերի բաշխումն անհամաչափ է արել և արտոնություններ տվել Թորոսյանի կնոջ ղեկավարած կենտրոնին։

«Իմ կինը հիմնարկ չունի, պարզապես բժշկական հիմնարկի տնօրեն է , և դրա մասին բազմիցս խոսել է... Այս ամենի անհեթեթությունը կայանում է նրանում, որ նույնիսկ պարզ թվեր նրանք չգիտեն, 2,7 մլրդ դրամ չգիտեմ՝ որտեղից են վերցրել, դժվարամատչելի հետազոտությունների բյուջեն մի քանի հարյուր միլիոն դրամ է և տարբեր բժշկական կենտրոններին սկսած 5-ից 10 մլն դրամի շրջանակներում տրվել է գումար՝ կախված հիվանդների հաճախելիությունից»,-հայտնել է նախարարը։

Նա նշել է, որ չի ուզում անդրադառնալ Թամամյանի մյուս հայտարարություններին, դրանք որակելով անհեթեթություն։

Հեղինակ` Սոնա Գեւորգյան