Փաստ ինֆո

Ֆանարջյանի անվան ուռուցքաբանության ազգային կենտրոնի շուրջ տեղի ունեցող խմորումների շուրջ «Փաստինֆո»-ն զրուցել է Ուռուցքաբանության ազգային կենտրոնի բուժական գծով նախկին փոխտնօրեն Վարուժան Շահսուվարյանի։ Նշենք, որ ՀՀ առողջապահության նախարարը առանց բացատրությունների աշխատանքից ազատել է ՀՀ գլխավոր ուռուցքաբան Արմեն Տանանյանին, ինչից հետո զբաղեցրած պաշտոնից հեռացել է նաեւ Վարուժան Շահսուվարյանը։ Արմեն Տանանյանն, ի դեպ, այսօր հրաժեշտ է տվել կոլեկտիվին։

- Պարոն Շահսուվարյան, ի՞նչ է կատարվում Ուռուցքաբանության ազգային կենտրոնի շուրջ, ո՞րն է անսպասելի պաշտոնանկությունների պատճառը։

-Մեկ պաշտոնանկություն է եղել, տնօրենի պաշտոնից ազատման՝ նախարարի հրամանն է եղել։ Քանի որ վերջին 5 տարիների ընթացքում ես եղել եմ բուժական գծով տնօրենի տեղակալը եւ ինձ համար անհասկանալի էր ազատման պատճառը, որովհետեւ ընդհանրապես հիմնավորում գոյություն չուներ, ես որոշեցի հրաժարական ներկայացնել եւ իմ պարտականությունները վայր եմ դրել։ Սա է ամբողջ պատմությունը։

-Նախարար Թորոսյանի որոշումն անսպասելի էր, հատկապես, երբ առողջապահության նախարարությունը բարձր էր գնահատել կենտրոնի ղեկավարության գործունեությանը, նշվել էր կենտրոնի գրանցած հաջողությունների մասին։ Իրականում ի՞նչ կա այս ամենի հետևում։

-Մեր ոլորտը եղել է թերֆինանսավորած վիճակում եւ այդ ֆինանսավորմամբ, հաշվի առնելով մեկի հիվանդի վրա ծախսվող գումարը , սարքավորումների, վերապատրաստումների վիճակը, տարածքի պահպանման վրա ընդհանրապես գումար չտրամադրելը , կարելի է ասել, որ չտեսնված բան էր 5 տարում այդ ձեռքբերումները։ Ես դժվարանում եմ այդ հարցին պատասխանել, միգուցե նախարարը այլ զարգացումներ է տեսնում։

- Այս խմորումները արդյո՞ք չեն ազդի հիվանդների բուժման գործընթացի վրա։ Կա՞ն այլ բժիշկներ , որոնք եւս կհետեւեն Ձեր օրինակին եւ կհեռանան տնօրենի հետ։

- Որեւէ մեկը կոչ չի արել բժիշկների հեռանալ։ Կենտրոնը հիմա բնականոն աշխատանքով աշխատում է։ Իհարկե, դժգոհություններ կան, բժիշկների համար անհասկանալի է եղել ազատման որոշումը։ Որոշակի կարճատեւ ազդեցություն գուցե ունենա, ինչ վերաբերում է մեր՝ այստեղից դուրս գալուն, մենք երկրից չենք հեռանա եւ մի որեւէ բժշկական հաստատությունում կաշխատենք, մարդիկ կգտնեն իրենց բժիշկներին, յուրաքանչյուր հիվանդ ինքն է որոշում, թե ով է իր բժիշկը։ Մարդիկ կաշխատեն, կարծում եմ՝ պատկան մարմիններն էլ հետեւություններ կանեն։

-Պարոն Շահսուվարյան, խոսեցիք կենտրոնի թերֆինանսավորման խնդրի մասին։ Այսօր ուռուցքաբան Գեւորգ Թամամյանը նախարար Արսեն Թորոսյանի՝ չկայացած ասուլիսի ժամանակ նաեւ մասնավոր կենտրոնների պետպատվերի ավելացման խնդիրն է բարձրացրել, նշել, որ կրկնապատկվել է նախարարի կնոջը պատկանող կենտրոնի ֆինանսավորումը։ Այստեղ խնդիր չե՞ք տեսնում՝ պետական կենտրոնի թերֆինանսավորման ֆոնին։

-Ես չգիտեմ, թե որ մասնավոր կլինիկային որքան գումար է տրամադրված, բայց ես գտնում եմ, որ պետական ուռուցքաբանական կենտրոնը պետք է միանշանակ այլ հարթության վրա լինի, առաջնահերթությունը միանշանակ պետք է տրվի պետական կլինիկային, որովհետեւ դա սոցիալական հարց է լուծում։ Պատկերացրեք, թե ժամանակին ճիշտ բուժված, ուռուցքը վերապրած հիվանդները, որոնք կարող են վերադառնալ կյանք, ինչքան տնտեսական մեծ օգուտ կարող են բերել երկրին։ Պետք է մարդկանց առողջացնել , կյանք վերադարձնել, որ տնտեսությունն էլ դրանից չտուժի։ Եթե հարցը այդպես դիտարկվի, օնկոլոգիային նորմալ ֆինանսավորում տրամադրվի, դրանից տնտեսությունն էլ կշահի։

-Գեւորգ Թամամյանն այսօր նաեւ տարակուսանք էր հայտնել, թե նախարար Արսեն Թորոսյանը ուռուցքաբանության կենտրոնին հորդորել է հերթագրել հիվանդներին ։ Կիսո՞ւմ եք նրա մտահոգությունը։

-Ուռուցքով հիվանդին ինչպե՞ս կարելի է հերթագրել, որովհետեւ, եթե ես դեկտեմբերին հերթագրում եմ մի հիվանդի, որը առաջին կլինիկական փուլում է գտնվում, բայց նրան հունվարի վերջին կամ փետրվարին պետք է պետպատվերով սպասարկենք,այդ հիվանդությունը կարող է հասնել 2-րդ, 3-րդ , 4-րդ փուլ , որտեղ նույն վիրահատությունն իրականացնելը, ընդհանրապես կարող է դառնալ անհնարին։ Այստեղ օնկոլոգների գնահատականը նույնն է եւ, իհարկե, երկրորդ կարծիք չի կարող լինել ։ Այդ հերթագրումը թերֆինանսավորման հետեւանք է, որը եղել է շատ երկար տարիներ։ Այնպես չէ, որ սա մեկ օրվա խնդիր է , այդ մասին մենք երկար տարիներ բարձրաձայնել ենք ։

- Եվ, վերջում, ի՞նչ ասելիք ունեք նախարարին։

-Ինչ ասելիք ունեի, ամբիոնից հնչեցրել եմ, փոխնախարարը լսել է, կարծում եմ՝ կփոխանցի։ Ցանկանում եմ ասել, որ մեզ համար անհասկանալի է ու չպատճառաբանված է այդ որոշումը եւ այս կոլեկտիվը այն ծանր աշխատանքը տանող կոլեկտիվն է, որը իրավունք ուներ գոնե պատճառաբանությունը լսելու, նման որոշում հրապարակելը ուղղակի անհարգալից վերաբերմունք էր մեր բոլորի նկատմամբ։

Աղբյուր` Փաստինֆո