Փաստ ինֆո

Մեր ակնկալիքը դատարաններից հայցի բավարարումն է ամբողջ ծավալով, քանի որ բացակայում են համապատասխան փաստական տվյալները։ Այս մասին «Փաստինֆո»-ի հետ զրույցում ասաց ՀՀ երկրորդ նախագահի աշխատակազմի ղեկավար Արմեն Գևորգյանի ներկայացուցիչ Ալեքսանդր Կոչոբաևը։

Ավելի վաղ տեղեկացրել էինք, որ Արմեն Գևորգյանը հայցադիմում է ներկայացրել դատարան՝ ընդդեմ «Իմ քայլը» խմբակցության պատգամավոր Արուսյակ Ջուլհակյանի և փաստաբան Մուշեղ Շուշանյանի։ Ալեքսանդր Կոչոբաևի խոսքով` հայցի հիմքում ընկած են պատգամավորի և փաստաբանի հրապարակային խոսքում հնչեցրած տեղեկությունները, որոնք փաստաբանի կարծիքով վիճահարույց են։

Նշենք, որ օգոստոսի 7-ին Մուշեղ Շուշանյանը նշել էր, որ հստակ տեղեկություններ կան այն մասին, որ Ռ. Քոչարյանի աշխատակազմի ղեկավարը ներգրավված է եղել կոռուպցիոն գործընթացներին։ Պատգամավոր Արուսյակ Ջուլհակյանն էլ նշել է, որ Արմեն Գևորգյանը կոորդինացրել է կաշառքներ տալու, քաղաքացիներին զանգվածային ձևով ունեզրկելու և հակասահմանադրական որոշումներ ընդունելու գործընթացները։ Փաստաբանի դիտարկմամբ՝ այս հայտարարությունները չունեն փաստական որևէ հիմք։ Վերջինիս խոսքով Արմեն Գևորգյանի դիրքորոշումն այս հարցում հստակ է. «Հնչեցված արտահայտություններն իրականությանը չեն համապատասխանում, միանշանակ արատավորում են Արմեն Գևորգյանի պատիվը, արժանապատվությունը, բարի համբավը և խախտում նրա անմեղության կանխավարկածի իրավունքը»,-ընդգծեց փաստաբանը։

Նրա կարծիքով հայցադիմումը կարող է մերժվել միայն մեկ դեպքում, եթե ներկայացվեն համապատասխան փաստեր. «Հարցը հօգուտ մեզ չի լուծվի միայն մեկ պարագայում, եթե Մուշեղ Շուշանյանը և Արուսյակ Ջուլհակյանը այն, ինչ անվանում են հստակ տեղեկություններ, հրապարակեն։ Եթե լինեն փաստական տվյալներ, որ այո՛ Արմեն Գևորգյանը ներգրավված է եղել կոռուպցիայի մեջ և համակարգել է վերոնշյալ գործողությունները, ապա այդ դեպքում կարող ենք խոսել հայցը մերժելու մասին»,-նշեց Ալեքսանդր Կոչոբաևը։

Փորձեցինք զրուցել նաև փաստաբան Մուշեղ Շուշանյանի հետ, սակայն վերջինս հրաժարվեց որևէ կերպ մեկնաբանել իր դեմ ներկայացված հայցադիմումը, միայն ասաց. «Շատ լավ է արել։ Կհանդիպենք դատարանում»։

Հեղինակ` Հասմիկ Կոշկարյան