Փաստ ինֆո

Օգոստոսի 1-ից Քարահունջում և շրջակա ևս երկու գյուղում խոզեր են անկում՝ մեկ ամսվա ընթացքում ավելի քան 200 խոզ: «Փաստինֆո»-ի հետ զրույցում Քարահունջի բնակիչ Վալերիյ Մանուչարյանը ասաց, որ գյուղացիները, չիմանալով ինչն է կենդանիների անկման պատճառը, չստանալով դեղորայքային աջակցություն համապատասխան կառույցներից և չկարողանալով որևէ միջոց ձեռնարկել, սատկած կենդանիների մի մասին թաղել են իրենց այգիներում, որոշներին լցրել բաց դաշտերը կամ Քարահունջ գետը:

«Օգոստոսի 1-ից խոզերը սատկում են: Սա մեզ մոտ առաջին դեպքն է: ՍԱՊԾ-ի մասնագետները մի քանի տեսակի հիվանդություն էին նշում, որոնցից 4-ը ժխտվել է, մնացել է միայն դասական կամ աֆրիկյան ժանտախտը, որը ո՛չ հերքվում է, ո՛չ հաստատվում, պատճառը խոզերի դասական ժանտախտ հիվանդության նկատմամբ համապատասխան ախտորոշիչ հավաքածուների բացակայությունն է»,- ասաց բնակիչը:

ՍԱՏՄ ղեկավար Գեորգի Ավետիսյանը մեզ հետ զրույցում ասաց, որ պատճառները կարող են տարբեր լինել, օրինակ այն, որ կենդանիներին փակ տարածքներում չեն պահել, այլ ազատ են թողել:

«Խոզերին ազատ են պահել, ինչը օրենքով արգելվում է: Անկման պատճառները կարող են տարբեր լինել՝ սկսած կերային թունավորումներից , մինչև կոկային վարակներ: Դասական ժանտախտը պատվաստվում է, իսկ աֆրիկյանը ՀՀ տարածքում 2011թ-ից չի գրանցվել»:

Վալերիյ Մանուչարյանն ասում է՝ գյուղացիներն անզոր են, չգիտեն անգամ այդ միսն ուտելու ենթակա՞ է, թե՞ ոչ: ՍԱՊԾ պետը հիվանդ կենդանու միսն ուտել խորհուրդ չի տալիս:

Չնայած արդեն 5 օր է , ինչ խոզ չի անկել, բայց կենդանիների մի մասը հիվանդության պատճառով արդեն երկար ժամանակ է չեն սնվում:
«Փոխանակ պատճառը գտնեն ու բուժեն, մեզ ասում են՝ պետք է փակ պահեիք: Գյուղացիները մտածում են, որ հենց ժանտախտ է, որը ո՛չ հերքվել, ո՛չ հաստատվել է»:

Լուսանկարը՝ մտահոգ քարահունջեցի ֆեյսբուքյան էջից

Հեղինակ` Անահիտ Հովհաննիսյան