Փաստ ինֆո

Ամուլսարի շահագործման վերաբերյալ ՀՀ վարչապետ Նիկոլ Փաշինյանն իր դիրքորոշումը կհայտնի սեպտեմբերի 4-ից հետո, քանի որ տեսակոնֆերանսի ժամանակ վարչապետի համար հնչել են շատ նորություններ։ Այս մասին «Փաստինֆո»-ին ասել է վարչապետի խոսնակ Վլադիմիր Կարապետյանը։

«Փաշինյանը մի անգամ ֆեյսբուքում գրառում է կատարել և նշել, որ պետք է զրույցը շարունակել ու իսկապես, եթե տեսանյութը նայած լինեք, նկատած կլինեք, որ որոշ բաներ նորություն էր անգամ իր համար»,- ասաց Վլադիմիր Կարապետյանը՝ պատասխանելով հարցին արդյո՞ք «Էլարդ»-ի հետ Skype կոնֆերանսից հետո Փաշինյանի մոտ տեսակետի փոփոխություն է եղել, քանի որ մինչ այդ վարչապետն ասել էր, որ Ամուլսարի շահագործումը կառավարության, պետության, ժողովրդի, երկրի շահերից է բխում, իսկ կոնֆերանսի ժամանակ արդեն խոսվում է նոր ՇՄԱԳ-ի մասին։

Հիշեցնենք, որ իր ուղիղ եթերներից մեկում Փաշինյանն ասել էր. «Մեր կառավարության, պետության, ժողովրդի, երկրի շահերից է, որ մենք մեր կողմից առաջադրված պայմանը և ժողովրդի վստահության քվեն ստացած պայմանը բավարարենք, այսինքն՝ հնարավորություն տանք, որպեսզի Ամուլսարի հանքը շահագործվի։ Հիմա ես խոսում եմ այս պահի դրությամբ ինձ մոտ առկա տեղեկատվությամբ, եթե տեսականորեն ի հայտ կգա տեղեկատվություն, որն իմ գնահատականը գլխի վայր կշրջի, ես ոչնչով կաշկանդված չեմ, բայց դա պետք է տրամաբանորեն լինի»։

Կարապետյանը նշեց, որ «Էլարդ»-ի հետ Skype կոնֆերանսն եզրափակվել է Շրջակա միջավայրի նախարար Էրիկ Գրիգորյանի հետ երկխոսությամբ, և ինքը կարծում է, որ հենց նախարարության տված եզրակացությունը շատ կարևոր կլինի զրույցը շարունակելու՝ հետագա քայլերի համար։

«Փաստինֆո»-ն փորձեց ճշտել նաև, թե վարչապետն երբ է պատրաստվում ամփոփել «Էլարդ»-ի հետ կոնֆերանսը, քանի որ ֆեյսբուքյան գրառմամբ ասել էր. «Նյութը կնայեք, կխոսենք»։

«Կարծում եմ, ըստ ինձ, ավելի տրամաբանական կլինի այդ զրույցը կամ դիրքորոշումն ակնկալել սեպտեմբերի 4-ից հետո, երբ Շրջակա միջավայրի նախարարությունն իր դիրքորոշումը կհայտնի»,-«Փաստինֆո»-ին հայտնեց վարչապետի խոսնակը։

Հեղինակ` Սոնա Գևորգյան