Փաստ ինֆո

Սահմանադրական դատարանը վարույթ է ընդունել փաստաբան Արթուր Ղամբարյանի վստահորդ, Ոստիկանության՝ լիազորությունները կասեցված մայոր Նշան Թադեւոսյանի՝ աշխատավարձ չտրամադրելու և իր դիմումի հիման վրա աշխատանքից ազատվելու արգելքի մասին դիմումը, որով վիճարկվում է «Ոստիկանությունում ծառայության մասին» ՀՀ օրենքի 43-րդ հոդվածի 9-րդ մասի 2-րդ պարբերությամբ ամրագրված դրույթի և «Հայաստանի Հանրապետության ոստիկանության կարգապահական կանոնագիրքը հաստատելու մասին» ՀՀ օրենքի 16.1-րդ հոդվածի 1-ին մասի սահմանադրականության հարցը։

Բանն այն է, որ Նշան Թադեւոսյանը, ծառայելով ՀՀ ոստիկանության ճանապարհային ոստիկանության ճանապարհապարեկային ծառայության 1-ին սպայական գումարտակի 5-րդ սպայական դասակում՝ ավագ տեսուչի պաշտոնում, 2018 թվականին որպես մեղադրյալ է ներգրավվել ՀՔԾ-ում քննվող մի քրեական գործի շրջանակում, որ հարուցվել է ՀՀ ՔՕ-ի  311-րդ հոդվածի 3-րդ մասի 1-ին և 3-րդ կետերի՝ խոշոր չափերով կաշառքւ շորթման և 308-րդ հոդվածի 1-ին մասի՝ պաշտոենական լիազորությունները չարաշահելու հատկանիշներով։ Դրանից հետո նրա լիազորությունները դադարեցվել են, եւ օրենքի պահանջով նա աշխատավարձ չի ստացել բացառությամբ առաջին երկու ամսվա։

«Փաստինֆո»-ի հաղորդմամբ՝ ՄԻՊ-ին ուղղված իր դիմումում Նշան Թադեւոսյանն ընդգծել է, որ «Ոստիկանությունում ծառայության մասին» ՀՀ օրենքի 43-րդ հոդվածի 9-րդ մասի 2-րդ պարբերությամբ ամրագրված «աշխատավարձը վճարվում է մինչև երկու ամսվա համար, իսկ մնացած վճարումը կատարվում է գործի` արդարացնող հիմքով ավարտի դեպքում» դրույթը խախտել է իր մասնավոր և ընտանեկան կյանքի անձեռնմխելիության իրավունքը և իրեն զրկել է արժանապատիվ՝ նույնիսկ նվազագույն գոյության հնարավորությունից։ Ըստ հայցվոր կողմի՝ ստեղծվել է մի իրավիճակ, երբ Ոստիկանության մայորի լիազորությունների կասեցման պայմաններում վերջինս մի կողմից՝ չի ստանում աշխատավարձ կամ որևէ այլ հատուցում, մյուս կողմից՝ չի կարողանում համատեղությամբ կատարել այլ աշխատանք՝ բացի գիտամանկավարժական գործունեություն իրականացնելուց, կամ չի կարողանում իր նախաձեռնությամբ ազատվել ոստիկանության ծառայությունից։

Դրանից բացի հայցվոր կողմը ուշադրություն է հրավիրել այն հանգամանքին, որ հանրային ծառայության մի շարք ոլորտներում, ինչպես, օրինակ, Դատախազությունն է, Քննչական կոմիտեն, Մաքսային ծառայությունը, քրեական հետապնդում հարուցելու կամ ծառայողական քննություն կատարելու հիմքով անձի լիազորությունները կասեցնելու ողջ ժամանակահատվածում ծառայողի աշխատավարձը պահպանվում է:  Մինչդեռ «Ոստիկանությունում ծառայության մասին» ՀՀ օրենքով նախատեսված է հակառակ կարգավորումը. «Համանման կարգավիճակ ունեցող անձանց վերաբերյալ տարբերակված օրենսդրական կարգավորումները թույլատրելի են, եթե նման տարբերակումը հետապնդում է տեսանելի և իրավաչափ նպատակ: Տվյալ դեպքում, անհասկանալի է, թե օրենսդիրն ինչ իրավաչափ նպատակից ելնելով է, օրինակ՝ ՀՀ քննչական կոմիտեի՝ լիազորությունները կասեցված քննիչի համար պահպանել նրա աշխատավարձը, իսկ ՀՀ ոստիկանության ծառայողների, որոնց գործառույթները մի շարք ոլորտներում նույնական են քննիչի գործառույթների հետ, նախատեսված է հակառակ տրամաբանության կարգավորում: Իրավաչափ նպատակի բացակայության դեպքում, պետք է փաստել, որ օրենսդիրը՝ ՀՀ լիազորությունները կասեցված ոստիկանի նկատմամբ, ՀՀ դատախազների և ՀՀ քննչական կոմիտեի քննիչների համեմատության դրսևորել է խտրական մոտեցում»,-նշել է հայցվոր կողմը։

ՍԴ-ում գործով քննությունը նշանակվել է դեկտեմբեր ամսին։

«Փաստինֆո»-ի տեղեկություններով՝ ՄԻՊ-ին դիմելուց բացի Նշան Թադեւոսյանի փաստաբան Արթուր Ղամբարյանը ընդդեմ Ոստիկանության հայց է ներկայացրել Երեւանի ընդհանուր իրավասության դատարան՝ աշխատավարձը վճարելուն պարտավորեցնելու պահանջով։ Ներկայումս նրա հայցը գտնվում է քննության փուլում։

Հեղինակ` Միլենա Խաչիկյան