Փաստ ինֆո

«ՀՀ-ն ժողովրդավարական պետություն է, ազատ և հպարտ քաղաքացիների պետություն, և սա ուղղակի կապ ունի կրթության հետ։ Կապն այնքանով է, որ ՀՀ-ն այլևս այնպիսի երկիր է, որտեղ ոչ թե ղեկավարում են քաղաքացիներին, այլ ղեկավարում են քաղաքացիները»,-այսօր  «Կենգուրու» մրցույթի հաղթողների հետ հանդիպման ժամանակ ասել է ՀՀ վարչապետ Նիկոլ Փաշինյանը։

Նա նշել է, որ քաղաքացի լինել նշանակում է ի վիճակի լինել կայացնել որոշումներ և կայացված որոշումների համար պատասխանատվություն կրել ։

«Իմ ընկալմամբ կրթությունն ամենակարևոր բաղադրիչն է յուրաքանչյուր մարդու համար տնօրինելու, տիրապետելու, կառավարելու սեփական կյանքը, կայացնելու որոշումներ, իրականացնելու այդ որոշումները և կրելու այդ որոշումներից բխող պատասխանատվությունը»,-ասել է ՀՀ վարչապետը։

Նա ընդգծել է, որ պետք է երիտասարդությանն ուղերձ հղել, որ լավ որակի կյանք ունենալու միակ և կարևորագույն երաշխիքը կրթությունն է.

«Կրթությունն է, որ երաշխավորում է մարդու կյանքի բարձր որակը, և ես հասկանում եմ, որ այսօր էլ շատ մարդիկ կարող են լինել, որ կասեն՝ ունեն բարձրագույն կրթություն, բայց կյանքի որակը այնքան էլ լավ չէ։ Բայց ես ուզում եմ ասել, որ կրթություն չի նշանակում դիպլոմ կամ առնվազն  կրթությունը դիպլոմ չէ։ Եվ կրթությունն ոչ միայն դիպլոմն է, այլև մի գործընթաց է, որ մարդուն պետք է ուղեկցի ամբողջ կյանքի ընթացքում»,-շեշտել է վարչապետը։

Փաշինյանը շնորհավորել է աշակերտներին գրանցած հաջողությունների համար և հույս հայտնել, որ դրանք նրանց ոգեշնչում են իմացության, գիտելիքի, գիտելիքները կյանքում կիրառելու հարցում։

«Ես Ձեզ, մեզ բոլորիս հաջողություն եմ մաղթում, որովհետև ՀՀ-ի մեր ընդհանրական պատկերացումը բարձր գիտելիքներով, կրթության հնարավորինս բարձր ցենզով քաղաքացիների երկիրն է»,-ասել է ՀՀ վարչապետ Նիկոլ Փաշինյանը։

Հեղինակ` Սոնա Գեւորգյան