Փաստ ինֆո

Ամուլսարի հանքի շահագործման թեմայով կոնֆերանսի ժամանակ փաստացի հնչեց այն նույն միտքը, որ այս ՇՄԱԳ-ը պետք է ուժը կորցրած ճանաչել։ Դա տարիներ շարունակ ասում են և՛ տեղական, և՛ միջազգային հեղինակավոր մասնագետները։ Այս մասին «Փաստինֆո»-ի հետ զրույցում ասաց բնապահպան, ակտիվիստ Անի Խաչատրյանը։

Վերջինս, անդրադառնալով երեկ տեղի ունեցած կոնֆերանսին, նշեց, որ իրենց համար ոչ մի նոր բան չհնչեց. «Մենք միշտ էլ ասել ենք, որ այս ՇՄԱԳ-ը պետք է ուժը կորցրած ճանաչել և կոնֆերանսի ժամանակ էլ հնչեց նույն միտքը։ Դա պարզ էր նաև «Էլարդ»-ի եզրակացությունից։ Կոնֆերանսն այնքանով էր լավ, որ վարչապետը տեսավ՝ մեր բոլոր ասածները հիմնավոր են։ Վարչապետին մոլորեցնում են կամ ինչ-ինչ պատճառներով այդ ամենը սխալ ներկայացնում»,-ասաց բնապահպանը։

Անի Խաչատրյանի խոսքով երեկ «Էլարդ»-ի փորձագետները ներկայացրեցին այն ամենը, ինչն ուղղակի գրված էր եզրակացության մեջ։ Սակայն Քննչական կոմիտեն մոլորեցնում էր մարդկանց իր ասուլիսներով և սխալ կերպ մեկնաբանելով այդ ամենը, իսկ թե շարժառիթը որն է, Անի Խաչատրյանը վստահ չէ. «Դա թող պետական կառույցները պարզեն և ուսումնասիրեն՝ կոռուպցիոն ինչ ռիսկեր կան այստեղ»։

Նա անդրադարձավ նաև Ամուլսարի գործով քննիչ Յուրա Իվանյանին, որը բնապահպանության նախկին նախարարի հորեղբոր որդին է. «Թող վարչապետը պարզի, թե ինչ նպատակով էր ՔԿ-ն ստանձնել «Լիդիան Արմենիա»-ի փաստաբանի կամ մամլո խոսնակի լիազորությունները՝ դուրս գալով իր լիազորությունների սահմաններից։ Կպարզվի և համապատասխան մարդիկ պատասխանատվության կենթարկվեն»,-նշեց Անի Խաչատրյանը։
Նա պնդում է՝ կոնֆերանսից հետո ոչ մի հիմք չկա, որպեսզի այդ ՇՄԱԳ-ով շարունակվի այս գործընթացը, մասնավորապես այն դեպքում, երբ բոլոր փաստերը ներկայացվեցին հենց «Լիդիան»-ի ներկայությամբ, իսկ նրանք չկարողացան խելամիտ փաստարկներ ներկայացնել։

Անի Խաչատրյանը կարծում է, որ կայուն տնտեսություն ունենալու համար կառավարության շահերից բխում է հանքը չշահագործել։ Նա պարզաբանում է որ հանքերը կարճաժամկետ և ռիսկային տնտեսությունը զարգացնելու տարբերակներ են։ Բնապահպանը պնդում է՝ իրավունք չունենք հանքը շահագործելու ճանապարհով գնալ և արձանագրում. «Մեր երկրում ոչ մի ստանդարտ չի պահվում։ Օրենսդրության մեջ ունենք բազմաթիվ բացեր, որոնք օֆշորում գրանցված ընկերություններին հնարավորություն են տալիս անխնա շահագործել մեր ռեսուրսները , իսկ հետագայում պատճառած վնասի համար որևէ պատասխանատվության չենթարկվել»,-ասաց բնապահպանը՝ նկատելով, որ պետք չէ ընտրել այս ճանապարհը հատկապես, եթե նժարին են դրված Ջերմուկ առողջարանային քաղաքը, Ջերմուկի ջրերն ու Սևանա լիճը։

Հեղինակ` Հասմիկ Կոշկարյան