Փաստ ինֆո

Տեսաուղերձի ընթացքում ELARD-ը հաստատեց այն ամենը, ինչ իր պաշտոնական հետազոտության մեջ էր նշել: «Փաստինֆո»-ի հետ զրույցում անդրադառնալով ELARD ընկերության փորձագետների հետ կառավարությունում անցկացված տեսակոնֆերանսի արդյունքներին եւ այդ առնչությամբ վարչապետ Փաշինյանի հայտարարություններին, ասաց բնապահպան Ինգա Զարաֆյանը:

Ըստ նրա` տեսաուղերձի ընթացքում որեւէ նոր հանգամանք ի հայտ չեկավ, այլ հարց է, որ կառավարությունը կամ Քննչական Կոմիտեն այդ ամենից  գուցե մի նոր բան հասկացան:

«Երբ նույն բանը տարբեր մարդիկ  են կարդում, տարբեր եզրակացության են գալիս, գուցե կառավարությունը նոր բան է հասկացել, որովհետեւ նոր բան այնտեղ չկար: Եթե հարուցված քրեական գործի շրջանակներում պաշտոնապես  տվյալ փորձագիտական գնահատականն է տրվել, ELARD-ը  այլ՝ նոր բան ասել չէր կարող, ELARD-ն ասաց այն, ինչ գրել էր, ընդամենը բացատրեց իր դիրքորոշումը»,-նշեց բնապահպանը:

Հիշեցնենք, ELARD ընկերության փորձագետների հետ անցկացված տեսակոնֆերանսից հետո վարչապետ Նիկոլ Փաշինյանը հայտարարել է, որ ի հայտ են եկել նոր հանգամանքներ, որոնք քննության եւ գնահատման կարիք ունեն: Փաշինյանը նշել էր, որ քննարկումը նաեւ կարեւոր տեղեկատվություն էր պարունակում՝ պատասխանելու համար հարցին, թե արդյո՞ք Ամուլսարի ոսկու հանքի նախագիծը նոր ՇՄԱԳ անցնելու կարիք ունի: Շրջակա միջավայրի նախարարությունը եզրակացություն պետք է տա մինչեւ սեպտեմբերի 4-ը:

Ինգա Զարաֆյանի խոսքով, եթե ՇՄԱԳ-ը ուժը կորցրած է ճանաչվում, անհրաժեշտ է նոր փորձաքննություն իրականացնել, իսկ Քննչական կոմիտեի խնդիրն էր՝ ընդամենը հասկանալ, թե նոր՝ չբացահայտված  ռիսկեր կա՞ն, թե՞ ոչ: «Քրեական գործն այդ մասին էր: Երբ ELARD-ը  ներկայացրեց էր իր հետազոտությունը, Քննչական կոմիտեն պետք է պատասխաներ այդ հարցին: Թե  նրանք ինչպես հասկացան այդ եզրակացությունը, մենք արդեն տեսանք, բայց Քննչական  կոմիտեն չի կարող ասել՝ ռիսկերը կառավարելի են, թե ոչ: Դա կարող է անել միայն լիցենզավորված մասնագետը , եթե նրանք  մասնագետ են հրավիրել, դա այլ հարց է, բայց ես այնտեղ մասնագետ չեմ տեսել, որովհետեւ ELARD-ը կանչված  չի եղել, որպեսզի  պատասխան տար, թե արդյոք ռիսկերը կառավարելի են: Նրանք ընդամենը պետք է ուսումնասիրեին՝ «Լիդիան Արմենիա»-ի փաստաթղթերում ռիսկերը պատշաճ ձեւով են գնահատված, թե՞՝ ոչ : Նրանք այդ հարցի պատասխանը պետք է տային,  նրանք փորձաքննություն չեն անցկացրել, թե արդյոք ռիսկերը կառավարելի են, իսկ Քննչական  կոմիտեն փորձաքննություն է իրականացրել իր նեղ քրեական գործի շրջանակում եւ այդ հարցի պատասխանը տալու իրավասություն չունի»:

Ինգա Զարաֆյանը համոզված է, որ Ամուլսարի հանքի շահագործել-չշահագործելու որոշումը, այդուհանդերձ, քաղաքական է լինելու:

«Քաղաքական որոշման կայացման համար, թերեւս առկա են այնպիսի հանգամանքներ, որոնց մասին մենք չգիտենք, բայց մենք ունենք  բազմաթիվ քաղաքական գործոններ, որոնք ներգրավված են այդ գործընթացում: Մենք ունենք զարգացման բանկեր, որոնք երաշխավոր են կանգնել, երբ Լիդիանը  հանդես է եկել Ամուլսարի ծրագրով եւ ստեղծվել է հենց Ամուլսարի  ծրագիրն իրականացնելու համար: Խոսքը  Միջազգային ֆինանսական կորպորացիայի եւ Վերակառուցման եւ զարգացման եվրոպական բանկի մասին է: Դրանք կոմերցիոն  բանկեր չեն, որ միայն բիզնեսով զբաղվեն, նրանք են երաշխավոր եղել  եւ սա է ամենամեծ ապացույցը այդ կասկածների: Բացի այդ, մենք ունենք ԱՄՆ-ի եւ Մեծ Բրիտանիայի դեսպանների հայտարարությունները, ունենք նախագահ Արմեն Սարգսյանի մասնակցությունը, որը թեեւ կարճ ժամանակահատվածով, բայց եղել է այդ գործընթացի  մասնակիցը եւ նա  քաղաքական գործիչ է: Այս հանգամանքները թույլ են  տալիս եզրակացնելու, որ այս հարցում քաղաքական որոշում պետք է լինի, քանի որ պետք է նկատի ունենալ նշված բոլոր հանգամանքներ»,-եզրափակեց բնապահպանը:

Աղբյուր` Փաստինֆո