Փաստ ինֆո

Ամերիկահայ գործարար Էդմոն Խուդյանի «Արին Կապիտալ» ընկերությունից առանձնապես խոշոր չափերի հափշտակություն կատարելու մեջ մեղադրվող Վլադիսլավ Մանգասարյանի նկատմամբ Երեւանի ընդհանուր իրավասության դատարանը համաներում է կիրառել։

Ինչպես արդեն տեղեկացրել ենք՝ խոսքը գնում է բավականին մեծ չարաշումների մասին. նրան մեղսագրվում է ընդհանուր առմամբ խարդախության եղանակով բազմաթիվ քաղաքացիներից ու ընկերությունից առանձնապես խոշոր չափերի՝ ավելի քան 2,5 մլրդ ՀՀ դրամի գույքի հափշտակություն, որը կատարվել է 2005-2011թթ.:

Մասնավորապես, ըստ մեղադրանքի, Վլադիսլավ Մանգասարյանը մի շարք անձանց առանձնապես խոշոր չափերով գույքը հափշտակելու դիտավորությամբ, գործընկերոջ` Էդմոնդ Խուդյանի, անվամբ սեփականության իրավունքով գրանցված Երևան քաղաքի Մաշտոցի 33Ա հասցեում (ներկայիս՝ Մաշտոցի 33/1) գտնվող հողամասի վրա կառուցվող շենքից գրասենյակային տարածքներ, բնակարաններ և ավտոկայանատեղեր վաճառելու կեղծ խոստումով, խաբեությամբ նրանցից ստացել ու հափշտակել է ընդհանուր առմամբ` 311.615.500 ՀՀ դրամ արժողությամբ առանձնապես խոշոր չափերով գույք, իսկ կատարված հափշտակությունը քողարկելու նպատակով ինչպես իր, այնպես էլ՝ շենքի հետ փաստացի առնչություն չունեցող և հիշյալ շենքից տարածքներ օտարելու իրավասություն չունեցող «ՎԷՌՄ» ՍՊ ընկերության անունից նրանց հետ կնքել է առքուվաճառքի նախնական պայմանագրեր:

Քրեական գործով անցնում է 26 տուժող, բացահայտվել է խարդախության 31 դրվագ։

Տարիներ առաջ խոսվում էր, որ առերեւույթ չարաշահումներին առնչություն է ունեցել նաեւ երրորդ նախագահ Սերժ Սարգսյանի եղբայրը՝ Լեւոն Սարգսյանը եւ որ Վլադիսլավ Մանգասարյանը վայելում է նրա հովանավորությունը, սակայն մեղադրյալի աթոռին եղել է միայն Մանգասարյանը, իսկ գործը դատարան ուղարկելու մասին հայտարարվեց դեռ երեք տարի առաջ՝ 2016 թվականի նոյեմբերին։ Քրեական գործը քննվել է Երեւանի ընդհանուր իրավասության դատարանի դատավոր Արմեն Բեկթաշյանի նախագահությամբ։

Տարիներ շարունակ ձգձգված դատավարությունն ավարտվել է այս տարվա հուլիսի 29-ին։ Արդյունքում՝ դատավորը հիմնավորված է համարել առաջադրված մեղադրանքը, խարդախությամբ կատարված առանձնապես խոշոր չափերի հափշտակությունը, սակայն Լեւոն Սարգսյանի երբեմնի հովանավորությունը վայելող անձի նկատմամբ որպես պատիժ չի նշանակվել ազատազրկում։ «Փաստինֆո»-ի տեղեկություններով՝ հուլիսի 29-ին հրապարակված դատավճռով դատարանը՝ Արմեն Բեկթաշյանի նախագահությամբ, նրա նկատմամբ համաներում է կիրառել ու ազատել պատժի կրումից։ Արձանագրենք, որ քրեական գործով մեղադրյալը չի վերականգնել ոչ ամերիկահայ գործարարին եւ ոչ էլ մյուս տուժողներին պատճառված վնասը։

Ավելին՝ Վլադիսլավ Մանգասարյանի դատավճռից անցել է արդեն մեկ ամիս, սակայն այն չի հրապարակվել «Դատալեքս» դատական-տեղեկատվական համակարգում, տուժող կողմը եւս չի ստացել, հետեւապես հնարավորություն չի ունեցել ծանոթանալու դրան և անհրաժեշտության դեպքում բողոքարկելու։ Մինչդեռ դատավոր Արմեն Բեկթաշյանը այս դատավճիռը կայացնելուց օրեր անց՝ օգոստոսի 5-ին ունեցավ առաջխաղացում ու նշանակվեց ՀՀ վերաքննիչ քրեական դատարանի դատավոր։

Փաստենք, որ Վ.Մանգասարյանին մեղադրանք էր առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով, որով նախատեսվում է մինչեւ 8 տարվա ազատազրկում` գույքի բռնագրավմամբ:

Աղբյուր` Փաստինֆո