Փաստ ինֆո

«Այսօրվա միջոցառումը շատ կարևոր է հասկանալու համար, թե դասական և խորհրդարանական դիվանագիտությունները ո՞ր ուղղությամբ են շարժվելու»,-այսօր դիվանագիտական ներկայացուցիչների ղեկավարների համաժողովի ժամանակ ԱԺ-ում ասաց «Բարգավաճ Հայաստան» խմբակցության պատգամավոր Արման Աբովյանը։

Նրա խոսքով, չնայած երրորդ հանրապետությունը քաղաքականապես երիտասարդ է, սակայն ունի այն տեսլականը, որը ձևավորվել է դարեր ի վեր։
«Մենք փորձել ենք այս տարիների ընթացքում ինտեգրվել բոլոր այն միջազգային կառույցների և գործընթացների մեջ, որոնց մասին այսօր արդեն խոսվել է»,-ասաց ԲՀԿ պատգամավորը։

Աբովյանը խոսելով Արցախի հարցի մասին ասաց, որ հաճախ թվում է, թե աշխարհը ծանոթ է դրա երանգներին։
«Մենք այստեղ ավելի շատ ռեակտիվ գործունեություն ենք իրականացնում։ Համոզված եմ, որ արցախյան հակամարտության արդարացի լուծումը կախված է նաև դեսպաններից և հյուպատոսներից։ Մենք հասկանում ենք, որ այսօր ՀՀ-ն գտնվում է տեղեկատվական կատաղի պատերազմի մեջ՝ Ադրբեջանի և Թուրքիայի հետ։

Հաճախ խոսելով ձեզ հետ, ընդգծել ենք մի կարևոր փաստ, որ արտասահմանում բավականին լուրջ տեղեկատվական ապատեղեկատվության հոսք կա և ամենակարևորն այն է, որ այն տեսլականը և արդարացի դիրքորոշումը, որ գոյություն ունի հասանելի լինի բոլոր մեր արտասահմանյան գործընկերների համար»,-դիմելով դեսպաններին ասաց ԲՀԿ պատգամավորը։

Նա նաև անդրադարձավ Սփյուռքին ու հայրենադարձությանը և շեշտեց, որ արդեն եկել է ժամանակը ոչ միայն հասկանալու, թե Սփյուռքը մեզ ի՞նչ կարող է տալ, այլև ձևավորելու համակարգ, որը թույլ կտա հասկանալ, թե մենք ինչ կարող ենք տալ Սփյուռքին։

«Շատ կարևոր է այդ տեսլականի ձևավորումը և կարևոր եմ համարում, որ այն ինչքան հնարավոր է շուտ ձևավորվի։ Դեսպանությունները ոչ միայն ՀՀ դիվանագիտական ներկայացուցչություններն են, այլ այն մարդիկ են որտեղից սկսում է Հայաստանը»,-ասաց Արման Աբովյանը։

Մանրամասներն՝ տեսանյութում

Հեղինակ` Սոնա Գեւորգյան