Փաստ ինֆո

Վերջին երեք տարիների ընթացքում արդեն չենք զարմանում, երբ տարվա տարբեր ժամանակահատվածներում տեսնում ենք 6, 7, 8 տոկոսանոց տնտեսական ակտիվություն ։ Այս մասին կառավարության նիստից հետո լրագրողների հետ զրույցում ասաց ՀՀ էկոնոմիկայի նախարար Տիգրան Խաչատրյանը։

Հարցին, թե ՀՀ-ն, երբ կկարողանա երկնիշ տնտեսական աճ ունենալ, նախարարն ասաց. «Ամեն ինչ կախված է տնտեսության տարբեր ոլորտներում ներդրումների ծավալի աճից։ Այսինքն` կառավարության ներկա ռազմավարական անելիքների շրջանակը և շեշտը լինելու է հատկապես տնտեսության տարբեր ոլորտներում արտադրողականության բարձրացվածությանն ուղղված ծրագրային աջակցությունը»,-ասաց Տիգրան Խաչատրյանը։

Նախարարը նաև ընդգծեց, որ ՄԱԿ-ի կառույցներից մեկի հետ համատեղ իրականացնում են ներդրումային միջավայրի գնահատում, որը պետք է վերհանի տնտեսության արագ աճի պոտենցիալ ունեցող ուղղությունները. «Մեր պայմանավորվածությունն այնպիսին է, որ այդ աշխատանքի արդյունքում ունենանք տնտեսության այն 4-5 ուղղությունները, որոնք առաջիկա ժամանակահատվածում կարող են ձգտել միլիարդ դոլար և ավելի արտադրության ծավալների»,-ընդգծեց Էկոնոմիկայի նախարարը։

Հեղինակ` Հասմիկ Կոշկարյան