Փաստ ինֆո

Գործադիրը «Հայաստանի պետական ազգային ակադեմիական երգչախումբ» ՊՈԱԿ-ին կտրամադրի 57 մլն դրամ։ Կառավարությունն այսօրվա նիստում որոշեց «Հայաստանի պետական ազգային ակադեմիական երգչախումբ» ՊՈԱԿ-ին պետբյուջեից հատկացնել 57 մլն դրամ՝ երգչախմբի ստեղծագործական, վարչականա և սպասարկող անձնակազմերին 2019թ.-ի օգոստոս-դեկտեմբեր ամիսներին լրավճարներ հատկացնելու համար։

2018թ.-ին պետբյուջեից հատկացված ֆինանսավորմանը զուգահեռ երգչախումբը մինչև մայիս ամիսը հովանավորչական գումար է ստացել նաև «Լույս» մշակութային, գիտական, կրթական հիմնադրամից։ Քանի որ ՊՈԱԿը դեռևս «Լույս» հիմնադրամի փոխարեն չէր կարողացել նոր հովանավորներ գտնել, նախարարությունը ՀՀ 2019թ.-ի պետբյուջեի օրենքում այլ ծրագրերի նվազեցման հաշվին նախատեսել է 50 մլն դրամ՝ լրավճարի հատկացման համար։
Վարչապետի համար, սակայն, անհասկանալի է, թե ինչու «Հայաստանի պետական ազգային ակադեմիական երգչախումբը» պետք է ֆինանսավորվի ինչ-որ անհատ մարդկանց, բարեգործների կողմից։ Նիկոլ Փաշինյանի կարծիքով սա վատ տրամաբանություն է. «Մենք մշակույթն ու արվեստը պետք է դիտարկենք որպես տնտեսության ճյուղերից մեկը։ Չպետք է թույլ տանք, որ պետական մշակութային օջախներն անընդհատ բարեգործությունների հույսին մնան, բայց մյուս կողմից էլ պետք է հստակ խնդիր դնել, որ սա տնտեսության ճյուղ է և պետք է որոշակի տնտեսական կանոններով ապրի, աշխատի, մասնավորապես ավելանցի սեփական եկամուտները»,-ընդգծեց վարչապետը։

Վերջինս վստահեցրեց, որ 2020 թ.-ի պետբյուջեում այս հարցը պետք է ամբողջական լուծվի, քանի որ չի կարելի սեփական երկրի կարևորագույն մշակութային օջախներին դնել այն վիճակում, որ «ծուռ վզով» գնան տարբեր բարեգործական կազմակերպությունների մոտ գումար խնդրելու։

Հեղինակ` Հասմիկ Կոշկարյան