Փաստ ինֆո

«Մուդիզի վարկանիշով մեր տարածաշրջանի երկրներից Վրաստանը և Ադրբեջանը մեզ հետ համարյա նույն մակարդակի վրա են: Թուրքիայի գնահատականը ավելի վատ հեռանկարներ է կանխատեսում»: Այսօր տեղի ունեցած ասուլիսում ասել է ԱԺ «Իմ քայլը» խմբակցության պատգամավոր Արտակ Մանուկյանը՝ նշելով, որ ԵԱՏՄ անդամ երկրներից հետ ենք Ղազախստանից, բայց Բելառուսից առաջ ենք : «Մենք գտնվում ենք միջին դիապազոնում, «B1»-ից «Ba3» անցումը մեկ քայլ առաջ է , բայց անելիք շատ ունենք, որ մեծացնենք ներդրողների հետարքրքությունը»,- նշեց նա։

Պատգամավորը վստահեցնում է՝ Մուդիզում մեր վարկանիշի բարձրացումը ազդելու է ներդրումների վրա, բայց թե ի՞նչ չափով, կանխատեսել չի կարող: «Արտաքին աշխարհից եկող ազդակները վստահություն են ներշնչում: Օգոստոսի 27-ին Մուդիզ միջազգային վարկանիշային կազմակերպությունը Հայաստանին որակական այլ դիապազոն տեղափոխեց: Սա շատ կարևոր է հենց հիմա, քանի որ մենք հիմա ունենք հավելյալ գործիք, որով շփվում ենք աշխարհի հետ՝ դա պարտատոմսերի թողարկումն է: Սա նշանակում է , որ մենք կարող ենք ակնկալել պարտատոմսերի էլ ավելի նվազ պայմաններ, քան նախկինում մենք կարող էինք գեներացնել վարկանիշային ավելի ցածր սանդղակում գտնվելով, ինչն էլ նշանակում է, որ մենք՝ հարկատուներս, այդ պարտատոմսերի համար ավելի քիչ գումար պետք է վճարենք, քան եթե գտնվեինք ավելի բարձր ռիսկային գոտում:

Մեր տարածաշրջանում , գաղտնիք չէ, որ ներդրումների համար պայքար է գնում: Այս առումով Վրաստանն ու Ադրբեջանը մեզանից ավելի բարձր դիրքերում էին գտնվում: Մենք սրանով առաջ քայլ ենք արել: Ապագան դրական է դիտարկվում մեր այս գործընկերների կողմից»:
ԱԺ «Իմ քայլը» խմբակցության պատգամավոր Արտակ Մանուկյանն ասում է՝ 2006-ին Մուդիզում ավելի բարձր վարկանիշ ունեինք, բայց ֆինանսատնտեսական ճգնաժամի պատճառով այն ընկել է:

«2006-ին մենք ավելի բարձր վարկանիշ ունեինք, բայց կապված ֆինանսատնտեսական ճգնաժամի հետ տնտեսությունը խորը անկում ապրեց և Մուդիզի գնահատականերն էլ էին դրա մասին խոսում: 2013թ-ից շտկում կար վարկանիշի, բայց նեգատիվ հեռանկարներ էին կանխատեսվում: Վերջին երկու տարիներին այս առումով լճացում էր: Այս վարկանիշը տեսանելի է արտաքին աշխարհի համար: Բայց սպասել, որ սրանից հետո միանգամից ներդրողների աճ պետք է լինի , չի կարելի: Սրա համար պետք է ավելի շատ աշխատանք անել Ներդրողները ուղղորդվում են այս վարկանիշներով: Սա, իհարկե կարևոր է , բայց պետք են ներդրումային առաջարկներ»:

Պատգամավորը պնդում է՝ կա մի ճյուղ , որով մենք առավելություն ունենք մեր հարևան Վրաստանի նկատմամբ, և դա մարդկային ռեսուրսն է :
«Մենք առավելություն ունենք Վրաստանի նկատմամբ մարդկային կապիտալի առումով, որով մենք համեմատաբար ավելի գրավիչ ենք, և որը նախկինում ժառանգել ենք: Պետք է ջանքեր գործադրել, որ մարդկային կապիտալին խարսխված այն ուղղություններում, որոնք կարող ենք առաջարկել ներդրողին, էական առավելություն լինի: Եկամտային հարկի և շահութահարկի փոփոխությունն էլ միտված են կարծես թե համեմատական առավելությունը ցայտուն դարձնելուն, բայց ասել, որ վարկանիշի բարձրացման հիմքում դա է, կոռեկտ չէ»:

Լրագրողների այն հարցին, թե հնարավո՞ր է, որ օրինակ՝ Լիդիանի հարցում անադարացի լուծման դեպքում ներդրողների հետարքրքությունը նվազի, պատգամավորը պատասխանեց, որ՝ այո՛:

«Չնայած Մուդիզին հետաքրքիր են ինստիտուտները, նրանք գնահատում են ինստիտուտների կարևորությունը, բայց առանձին քեյսերը ևս հավելյալ ազդակներ են: Կոնկրետ այս դեպքում հնարավոր է, որ կայացված որոշումը ազդի հետագա ներդրումների վրա»:

Հեղինակ` Անահիտ Հովհաննիսյան