Փաստ ինֆո

«Երեկ Հայաստանի տնտեսության և Հայաստանի միջազգային տնտեսական կարգավիճակի համար շատ կարևոր իրադարձություն տեղի ունեցավ. վարկանիշային «Մուդիս» կազմակերպությունը բարձրացրել է Հայաստանի սուվերեն վարկանիշն ու հիմնավորումների մեջ կա մի կետ, որը շատ հստակ ներդաշնակվում է մեր այսօրվա հանդիպմանը»,-այսօր Ռազմարդյունաբերողների միության անդամների և ռազմաարդյունաբերական ոլորտի ընկերությունների ղեկավարների հետ հանդիպման ժամանակ ասաց ՀՀ վարչապետ Նիկոլ Փաշինյանը։

Նա նշեց, որ վարկանիշի բարձրացման հիմնավորումներից կարևորագույնն այն է, որ կառավարությունը Հայաստանում վերցրել է տնտեսության գիտելիքահենք ճյուղերը զարգացնելու մարտավարություն և քաղաքականություն։

«Բազմիցս ասել եմ, որ Հայաստանի տնտեսության մեր տեսլականն այն է, որ Հայաստանը պետք է լինի արդյունաբերական երկիր։ Արդյունաբերության և ընդհանրապես տնտեսության մեջ մենք առաջնային դերակատարում ենք տալիս ռազմարդյունաբերական համալիրին, պայմանով, որ այն պետք է ամեն օրվա, ամեն շաբաթվա, ամեն ամսվա և ամեն տարվա հետ լինի տեխնոլոգիական, այսինքն` համապատասխանի բոլոր ժամանակակից տեխնոլոգիական չափանիշներին կամ առնվազն շարժվի այդ ուղղությամբ»,-ասաց ՀՀ վարչապետն ու ավելացրեց, որ երկարաժամկետ իմաստով պետք է նաև տեխնոլոգիական  նախաձեռնություններ ցուցաբերելու, տեխնոլոգիական նորարություններ արտադրելու հնարավորություններ լինեն։

Նա ընդգծեց, որ ռազմարդյունաբերական համալիրն ունի մի քանի առանցքային նշանակություն, որոնք բոլորն էլ ունեն ռազմավարական բնույթ։

«Այն, որ մեր երկիրը պետք է ունենա ուժեղ ռազմարդյունաբերական համալիր, բխում է անվտանգային այն միջավայրից, որում մենք այսօր գտնվում ենք, և մեր երկրի անվտանգության կարիքները ակնհայտորեն բերում են այդ մտքին»,-նշեց Փաշինյանը։

Նրա խոսքով, սա նաև կնպաստի Հայաստանում տնտեսության զարգացմանը, նոր աշխատատեղերի ստեղծմանն ու  Հայաստանը բարձր որակավորում ունեցող աշխատուժի երկիր դարձնելու տեսլականին։

«Ռազմարդյունաբերական համալիրը մի ոլորտ է, որտեղ բանվորից սկսած ենթադրում է որակավորում, այսինքն` բարձր որակավորում ունեցող բանվորներ, արհեստավորներ և այլն։ Արտահանման ռազմավարությունը մեզ համար նույնպես շատ կարևոր է, և մեր ռազմավարական կուրսը պետք է լինի այնպիսին, որ Հայաստանի ռազմաարդյունաբերական համալիրը պետք է արտաքին շուկաների վրա աշխատելու հնարավորություն ունենա»,-նշեց վարչապետը։

Փաշինյանը շեշտեց, որ հենց այդ խնդիրների լուծման համար է, կառավարության կազմում ստեղծվել նոր, բարձր տեխնոլոգիական արդյունաբերության նախարարություն։

«Բոլորս հասկանում ենք, մինչև այդ ռազմավարական նպատակներին հասնելը մենք պետք է կարողանանք նաև մեր ներքին կարիքները հաշվի առնելով, մեր ռազմաարդյունաբերական համալիրի համար ապահովել որոշակի ներքին շուկա և պետք է կարողանանք ապահովել պետական պատվերներ, որպեսզի այդ համալիրը նախ կարողանա ապրել, ապա ոտքի կանգնել, զարգանալ և, իհարկե, մրցունակ արտադրանք տալ»,-շարունակելով խոսքն ասաց ՀՀ վարչապետ Նիկոլ Փաշինյանը։

Մանրամասները՝ տեսանյութում։

Հեղինակ` Սոնա Գեւորգյան