Փաստ ինֆո

Քրեական հեղինակություն համարվող Արթուր Ասատրյանին՝ Դոն Պիպոյին բերման ենթարկելու ժամանակ ոստիկանների գործողությունները փաստաբան Ռաֆայել Ամիրխանյանը որակեց անօրինական. «Այն, որ ոստիկանների գործողությունները համաչափ չեն և օրինական չեն, դա փաստ է»,- «Փաստինֆո»-ի հետ զրույցում այս կարծիքը հայտնեց Արթուր Ասատրյանի պաշտպանը։

Հիշեցնենք, որ օրեր առաջ «Հրապարակ» օրաթերթը տեսանյութ էր հրապարակել՝ նշելով, որ ոստիկանները փորձել են Դիլիջանում բռնի ուժով բերման ենթարկել Դոն Պիպոյին։ Տեղեկությունը ճշտելու համար «Փաստինֆո»-ն դիմել էր Ոստիկանության լրատվական բաժին, որտեղից տեղեկացրեցին, որ Ոստիկանությունն իր լիազորությունների շրջանակներում մշտապես իրականացնում է կանխարգելիչ գործողություններ։

«Փաստինֆո»-ի հարցին արդյոք պատրաստվում են բերման ենթարկելու ժամանակ ոստիկանների գործողությունների վերաբերյալ հաղորդում ներկայացնել, Ռաֆայել Ամիրխանյանը նկատեց, որ հարցն Արթուր Ասատրյանի հետ դեռ չի քննարկել. «Այդ թեմայով դեռ չեմ զրուցել նրա հետ, չեմ կարող ասել, թե ինչ դիրքորոշում կհայտնի Արթուր Ասատրյանն այս հարցի վերաբերյալ։ Պետք է քննարկենք, որից հետո միայն պարզ կդառնան հետագա անելիքները»,-ընդգծեց պաշտպանը։

Նշենք, որ «Դոն Պիպո»-ին բերման ենթարկելու տեսանյութին ֆեյսբուքյան իր էջում անդրադարձել էր նաև փաստաբան Գեորգի Մելիքյանը։ Վերջինս ընդգծել էր, որ ականատես ենք լինում անգրագետ, իրավաբանական որևէ հիմնավորում չունեցող իշխանական կամայականությամբ առաջնորդվող գործողության. «Անձին պարտավոր են տեղում պարզաբանել նրա իրավունքները, կասկածանքի էությունը, կամովին իրենց հետ ոստիկանություն ներկայանալու անհրաժեշտությունը և որոնց իրազեկվելուց հետո երբ չի ենթարկվի անձը կարող է հարկադրաբար բերման ենթարկվել։...Վերստին հաստատում եմ իմ այն համոզմունքը, որ հանցագործություն կատարելով հանցագործություն չեն բացահայատում»,-գրել էր փաստաբանը։

Աղբյուր` Փաստինֆո