Փաստ ինֆո

«Ձերբակալություններով ռեյտինգի բարձրացման կամ իրական խնդիրներից հասարակության ուշադրությունը շեղելու մեթոդը սպառված է: Այն կիրառվել որոշակի արդյունքը տվել է մինչեւ այս տարվա հունվար-փետրվար ամիսները, հիմա արդեն հասարակությունն ադապտացվել է այդ ամենին»,- «Փաստինֆո»-ի հետ զրույցում անդրադառնալով ՊԵԿ նախկին նախագահ, ֆինանսների նախկին նախարար Գագիկ Խաչատրյանի ձերբակալությանը, ասել է քաղաքագետ Գագիկ Համբարյանը:

Հիշեցնենք, Գագիկ Խաչատրյանը և նրա եղբորորդին՝ Կարեն Խաչատրյանը, պաշտոնեական դիրքի չարաշահման և առանձնապես խոշոր չափերով գույքի վատնման կասկածանքով բերման են ենթարկվել ՀՀ ԱԱԾ քննչական դեպարտամենտ և ձերբակալվել։

Ըստ քաղաքագետի, հասարակության մի զգալի հատվածի մոտ արդարացիորեն հարց է առաջանում, թե ինչո՞ւ է այս ամենը տեղի ունենում հենց տվյալ ժամանակահատվածում:

«Հասարակությունը բաց գործունեություն է ակնկալում, իսկ այս 1 տարի 4 ամսվա մեջ մենք չենք տեսել այդ թափանցիկությունը: Գագիկ Խաչատրյանի անունը, որպես ամենահայտնի կոռումպացված պաշտոնյայի, ամենաշատը շոշափվում էր նախորդ իշխանությունների օրոք եւ ամենաշատ շոշափողն էլ հենց ընդդիմադիր պատգամավոր Նիկոլ Փաշինյանն էր: Իշխանության գալուց հետո, այսպես ասած, ասֆալտին փռելու գործընթացի ժամանակ, որը շատ մեծ ցնծությամբ ընդունվեց հասարակության մի զգալի մասի կողմից, Գագիկ Խաչատրյանին ասֆալտին չպառկեցրեցին»,-նկատում է քաղաքագետը ու շարունակում.«Պարզվում է՝ օրինակ, Սամվել Ալեքսանյանը, Արտակ Սարգսյանը եւ մյուս օդիոզ եւ սկանդալային օլիգարխները, որոնց անունները Նիկոլ Փաշինյանը՝ ընդդիմադիր գործիչ եղած ժամանակ տալիս էր որպես օրինախախտների, պարզվում է ՝ շատ լավն են: Հասարակությունը զարմացած էր, որ այդ «լավերի» մեջ էին նույն Գագիկ Խաչատրյանը եւ Գագիկ Բեգլարյանը, եւ նրանց մոտ հարց է առաջանում՝ ինչո՞ւ հիմա»:

Քաղաքագետի խոսքով, Գագիկ Խաչատրյանի ձերբակալությամբ, իրականում իշխանությունը, նպատակ ունի հասարակության ուշադրությունը շեղել երկու կարեւոր խնդիրներից, որոնք հենց ինքն իր համար ստեղծեց. «Մեկը կեղծ օրակարգ Ստամբուլյան կոնվենցիան մեյդան բերելն էր, որի վավերացման մտքից պարզվում է՝ մեկ տարով հրաժարվում են եւ երկրորդը՝ Ամուլսարի խնդիրն է, որը շատ կարեւոր է եւ այստեղ իշխանությունները լուրջ դժվարություններ ունեն: Նախ, այս հարցում բացահայտ երեւաց իշխանության տարբեր ճյուղերի դիրքորոշումների տարբերությունը եւ վտանգ կա, որ «Իմ քայլը» դաշինքը կարող է պառակտվել, ինչի հետեւանքները Փաշինյանի համար ծանր կլինեն, ուստի, փորձ է արվում գոնե ժամանակավորապես հասարակությանը շեղել այս ամենից»:

Գագիկ Համբարյանի խոսքով, սակայն, ՊԵԿ նախկին նախագահի ձերբակալությունը հասարակությունը շատ հանգիստ ընդունեց, ավելին վարչապետ Փաշինյանի բնապահպան կողմնակիցները հասցրեցին սոցցանցերում գրել, որ այսկերպ Ամուլսարի խնդրից չեն շեղվելու:

«Պարոն Փաշինյանի վարչակարգը սովոր էր ձերբակալությունների միջոցով հասարակության ուշադրությունը շեղել կարեւոր ներքին ու արտաքին խնդիրներից, բայց այս անգամ հետհեղափոխական էյֆորիան չկա եւ հասարակությունը շատ հանգիստ վերաբերվեց Գագիկ Խաչատրյանի ձերբակալությանը, այսինքն, եթե հետհեղափոխական շրջանում այդ էյֆորիան վերապրած անձինք այնքան շատ էին , որ ծափողջյուններով էին ընդունում որոշ անձանց ասֆալտին փռելու , ձերբակալելու, ապա՝ ազատ արձակելու եւ նորից ձերբակալելու գործընթացները, հիմա այդ մեթոդը չանցավ: Փաստը արձանագրեցին նույնիսկ Նիկոլ Փաշինյանի էկոլոգ երկրպագուները, որոնք ի սկզբանե ողջունեցին թավշյա հեղափոխությունը եւ մինչեւ Ամուլսարի սկանդալը ակտիվորեն պաշտպանում էին Փաշինյանին եւ նրա վարչակազմին»:

Ըստ քաղաքագետի, եթե իշխանությունը շարունակի գործի դնել նույն մեթոդը, այն հակառակ ազդեցություն կարող է ունենալ իշխանության ռեյտինգի վրա:

Հավելենք, որ մեկ այլ՝ ՀՔԾ-ում քննվող քրեական գործով ՊԵԿ նախկին նախագահ Գագիկ Խաչատրյանը մեղադրյալի կարգավիճակ ունի: Նա մեղադրվում է 38-179-րդ հոդվածի 3-րդ մասի 1-ին կետով, այն է՝ առանձնապես խոշոր չափերի վատնում կազմակերպելը։ Ինչպես ավելի վաղ «Փաստինֆո»-ին հայտնել էին ՀՔԾ-ից, այս գործով 800 միլիոն դրամի վերականգնում է եղել։

Անդրադառնալով պետությունից թալանված միջոցները բյուջե վերադարձնելու իշխանությունների հայտարարություններին, քաղաքագետը նկատեց. «Թերեւս գումարի պակաս կա գործող իշխանությունների մոտ եւ հիմա նրանք երկրորդ փուլով են անցնում նույն անձանց գրպանների միջով»։

Աղբյուր` Փաստինֆո