Փաստ ինֆո

«Նախեւառաջ, ինձ համար ավելի կարեւոր է Գագիկ Խաչատրյանի վերաբերյալ քրեական գործը, քան Ամուլսարի գործը, որովհետեւ առաջինում խոսքը գնում է պետությանը վնաս պատճառելու մասին, իսկ երկրորդում քննարկում է ընթանում՝ արդյո՞ք հնարավոր է վնաս լինի թե ոչ»,-«Փաստինֆո»-ի հաղորդմամբ՝ այսօր՝ լրագրողների հետ զրույցում, այս մասին ասաց ԱԺ փոխխոսնակ Ալեն Սիմոնյանը։

Ի պատասխան լրագրողի այն հարցին, թե ինչպե՞ս ինքը կարձագանքի այն տեսակետին, թե Գագիկ Խաչատրյանի ձերբակալման հարցը օրակարգ բերվեց Ամուլսարի թեմայից հանրային ուշադրությունը շեղելու համար, Ալեն Սիմոնյանն ասաց. «Ժպիտով։ Վերջիվերջո, քրեական գործերը ամիսներով, շաբաթներով քննարկվող գործեր են, եւ կան օրենսդրական կոնկրետ պահանջներ, թե որ մարմինը ինչ գործողություն պետք է իրականացնի։ Խնդրում եմ դուրս գալ այդ տրամաբանությունից, որը եղել է նախկինում, թե իբր ինչ-որ բան շեղելու համար այլ թեմա են բարձրացնում»։

Սիմոնյանը խորհուրդ տվեց ոչ մի դեպքում չշեղվել. «Մի շեղվեք, եթե դա այդքան կարեւոր է, մի շեղվեք»,-ասաց նա լրագրողներին։

Հիշեցնենք, որ երեկ խուզարկություններ կատարվեցին ՊԵԿ նախկին նախագահ Գագիմ Խաչատրյանի եւ նրա մերձավորների առանձնատներում, ինչից հետո նա եւ նրա եղբորորդին՝ Կարեն Խաչատրյանը, բերման ենթարկվեցին ԱԱԾ եւ ձերբակալվեցին պաշտոնեական դիրքի չարաշահման և առանձնապես խոշոր չափերով գույքի վատնման կասկածանքով։

Հեղինակ` Միլենա Խաչիկյան