Փաստ ինֆո

Այն ընկերությունները, որոնք հայտ են ներկայացրել  նոր սերնդի ՀԴՄ սարքեր ձեռք բերելու համար, սակայն դեռևս աշխատում են հին ՀԴՄ սարքերով, կարող են անարգել աշխատել։ Պետեկամուտների կոմիտեն այս տնտեսվարողների նկատմամբ  որևէ վարչարարություն չի իրականացնի, քանի դեռ համապատասխան մասնավոր ընկերությունները ՀԴՄ սարքեր չեն ներկրել և չեն վաճառել նրանց։ Այս մասին «Փաստինֆո»-ի հետ զրույցում ասաց ԱԺ «Իմ քայլը» խմբակցության պատգամավոր Սիսակ Գաբրիելյանը։ Նշենք, որ երեկ ֆեյսբուքյան իր էջում պատգամավորը դիմել էր ՊԵԿ նախագահ Դավիթ Անանյանին՝ հորդորելով հանդիպում կազմակերպել և քննարկել առկա իրավիճակը։

Սիսակ Գաբրիելյանից տեղեկացանք, որ ՀԴՄ սարք ներկրելու համար հայտ է ներկայացրել 9 կազմակերպություն, որոնցից մեկի հետ բանակցությունները հասել են վերջնական փուլի. «Արդեն այս շաբաթվա վերջ նրանց կողմից ներկրված սարքերում  տեխնիկական-ծրագրային ապահովումը կլինի, կանցնի վերջնական փորձարկումը և եթե ամեն ինչ բարեհաջող ընթանա, առաջին խմբաքանակը սեպտեմբերին կտրամադրվի քաղաքացիներին»,-ասաց պատգամավորը։

Հարցին արդյոք կա՞ տեղեկություն, թե քա՞նի ՀԴՄ սարք կներկրվի առաջին խմբաքանակով, պատգամավորը նկատեց՝  դա կախված է  ընկերության ֆինանսական ռեսուրսներից. «Այդ ընկերությունը գիտակցում է, որ 9300-ի պահանջարկ կա այս պահին, այսինքն՝ եթե ինքը վաղը 9300-ն էլ կարողանա ներկրել, ապա մեկ օրում կվաճառի, որովհետև փաստացի այդքան մարդ այս պահին վճարել է և հայտ է ներկայացրել։ Կարծես մոտավոր թիվ նշվեց, որ նախնական հաշվարկով 2-3 հազ սարք սեպտեմբերի առաջին կեսից հետո արդեն կլինի»,-ասաց Սիսակ Գաբրիելյանը։

Նա ընդգծեց, որ 9 ընկերություն ՊԵԿ-ի հետ աշխատում է և մեկն էլ կարծես ցանկանում է շուկա մտնել։ Պատգամավորի խոսքով բավական մեծ ՝ 100-200 հազ դոլար ներդրումի մասին է խոսքը գնում. «Կարծես լուրջ ընկերություն է ցանկանում շուկա մտնել։ Ընկերության ներկայացուցիչը  հանդիպման ժամանակ ՊԵԿ նախագահից տեղեկացավ, թե հատկապես ինչ աշխատանքներ պետք է իրականացնել հաջորդ փուլի համար, որովհետև ՀԴՄ սարքերը ներկրելուց բացի, պետք է տեղեկատվական ծրագրերը հարմարեցվեն սարքի մեջ»,-նկատեց պատգամավորը։

Բանակցությունների արդյունքում, եթե այս ընկերությանը նույնպես հաջողվի մտնել շուկա, ապա նախկին մենաշնորհի փոխարեն ՀԴՄ սարք կներկրի 10 ընկերություն, ինչն էլ ուղղակիորեն կազդի ՀԴՄ սարքերի գնի վրա. «Մեկը գուցե վաճառի 80 հազ-ով, մյուսը 90 հազ-ով, ի վերջո գինը բիզնես միջավայրը կթելադրի։ Եթե ընկերություններից մեկն էլ ցածր գին առաջարկի, բնականաբար, մրցակցության արդյունքում գինը կիջնի»,-ընդգծեց Սիսակ Գաբրիելյանը։

«Իմ քայլը» խմբակցության պատգամավորը խորհուրդ է տալիս այս ընթացքում տուգանված ընկերություններին դիմել բողոքարկման մարմին և բեկանել իրենց դեմ կայացված որոշումները. «Կազմակերպությունների կողմից նշվեց, որ իրենք պատրաստ են աջակցել տնտեսվարողներին։ Նոր ՀԴՄ սարք ձեռք բերելու հայտ ներկայացրած 9300 քաղաքացիների 80 տոկոսն ունի հին ՀԴՄ սարքեր, ՊԵԿ-ը չի տուգանի նրանց, քանի դեռ վերջիններիս նոր սերնդի ՀԴՄ սարքեր չեն տրամադրվել։ Նոր բացվող բիզնեսներն էլ պետք է անպայման նոր ՀԴՄ սարք ստանալու հայտ ներկայացնեն»,-ավելացրեց պատգամավորը։

Հեղինակ` Հասմիկ Կոշկարյան