Փաստ ինֆո

Աբովյան 22 Ա հասցեում գտնվող շենքի հարակից տարածքի բնակիչներն այսօր շենքի բակում բողոքի ակցիա էին կազմակերպել։ Նրանք դեմ են, որ այդ տարածքում 12 հարկանի շենք կառուցվի։ Վերջիններս պնդում են՝ իրենք բազմիցս խնդրել են, որ բարձրահարկ շենքի փոխարեն կառուցվի երկու-երեք հարկանի մանկապարտեզ, սակայն առանց հանրային լսում անցկացնելու քաղաքապետարանը բարձրահարկ շենք կառուցելու շինթույլտվություն է տվել։

Բնակիչներից մեկն ասաց, որ բակը ծանրաբեռնված է տարբեր շինություններով և եթե դրանց մեկն էլ ավելանա, ապա այնտեղ ապրել չի լինի։ Բնակիչները պնդում են՝ կան խախտված նորմատիվներ և պատրաստվում են դիմել դատարան։

Կենտրոնի թաղապետ Վիկտոր Մնացականյանն էլ լրագրողների հետ զրույցում հակառակը պնդեց. «Ինչու թույլտվություն չտալ, եթե նորմերը չեն խախտվել։ Այն, որ մարդիկ բողոքում են, հասկանալի է, սակայն ոչ մի նորմ խախտված չէ։ Բակային խոսակցությունից բացի եզրակացություն ունե՞ն, որ այդ շենքը կխանգարի կամ  կվնասի մյուսներին»,-ասաց թաղապետը։

Վերջինս ընդգծեց, որ նախնական տարբերակով շենքը պետք է լիներ 18 հարկանի և և 700 քառակուսի, սակայն կլինի 12 հարկանի՝ 490 քառակուսի. «Այս բակի ամենամեծ խնդիրն այն է, որ սարսափելի մեծ բակ է։ Սահմաններ չկա և կառուցապատողն իր վրա է վերցրել ամբողջ բակի բարեկարգումը՝ խաղահրապարակ, լուսավորման լեդեր, կանաչապատում և այլն»,-ավելացրեց Վիկտոր Մնացականյանը։

Բնակիչների հետ բանակցություններ իրականացնելիս թաղապետը նրանց վստահեցրեց, որ այստեղ որևէ անօրինականություն չկա և շենքին վնաս չի լինի։ Նա ներկայացրեց կառուցապատման ծրագիրը, որի համաձայն՝ կառուցապատող Լևոն Օրդուխանյանը 12 հարկանի շենքի 1-ին հարկը պատրաստ է անհատույց տրամադրել պետությանը՝ որպես մանկապարտեզ։

Աղբյուր` Փաստինֆո