Փաստ ինֆո

Ազգային ժողովում գույքի պակասորդի դեպքի առթիվ հարուցված քրեական գործով կարգավիճակ ունեցող անձ այս պահին չկա։ «Փաստինֆո»-ի հարցին ի պատասխան՝ այս մասին տեղեկացրեց Դատախազության հանրային կապերի բաժնի պետ Արեւիկ Խաչատրյանը։

Ավելի վաղ հայտնել ենք, որ Ազգային ժողովի աշխատակազմի ղեկավարը գրություն էր ուղարկել այն մասին, որ ԱԺ-ում մոտ 15 միլիոն դրամի գույքի պակասորդ կա, ինչի հիման վրա նյութեր են նախապատրաստվել, եւ հետագայում հարուցվել է քրեական գործ։

Արեւիկ Խաչատրյանը «Փաստինֆո»-ի հետ զրույցում մանրամասնեց, որ ԱԺ աշխատակազմի ղեկավար Տիգրան Գալստյանն իրենց գրությամբ դիմել է այս տարվա հուլիսի 3-ին. «Աշխատակազմի ղեկավարը գրություն է ուղարկել այն մասին, որ ԱԺ աշխատակազմի նստավայրի տարածքում իրականացվել է հիմնական միջոցների գույքագրում, ինչի արդյունքում պարզվել է, որ որոշակի միավոր հիմնական միջոցների պակասորդ կա։ Երեւան քաղաքի Արաբկիր վարչական շրջանի քննչական բաժնում նյութեր են նախապատարստվել եւ պարզվել է, որ պակասում է 36 միավոր գույք, որի ընդհանուր արժեքը կազմում է  15. 554. 953 ՀՀ դրամ»։

Նշենք, որ քրեական գործը հարուցվել է հուլիսի 21-ին ՀՀ ՔՕ-ի 179-րդ հոդվածի 3-րդ մասի 1-ին կետով, այն է՝ առանձնապես խոշոր չափով յուրացումը կամ վատնումը։

Նախաքննությամբ զբաղվում է Քննչական կոմիտեն։

Հեղինակ` Միլենա Խաչիկյան