Փաստ ինֆո

Դատարանը մերժել է ԱԺ նախկին պատգամավոր Մելիք Մանուկյանի եղբոր, «Սամ-Հար» ՍՊԸ-ի տնօրեն Ռոբերտ Մանուկյանի փաստաբանի բողոքը։ «Փաստինֆո»-ն այս մասին տեղեկացավ փաստաբան Հովսեփ Սարգսյանից։

«Դատարանը մերժեց Ռոբերտ Մանուկյանի նկատմամբ կալանավորումը որպես խափանման միջոց ընտրելու որոշման դեմ բողոքը։ Ռ.Մանուկյանը կշարունակի մնալ կալանքի տակ»,-ասաց փաստաբանը։

Նշենք, որ փաստաբանի խոսքով սա միջին ծանրության հանցագործություն է, որի համար մարդկանց չեն կալանավորում։ Բացի այդ՝ օրենսդիրը պահանջում է, որպեսզի դատարանը պատճառաբանի՝ ինչու է բացառիկ խափանման միջոցը՝ կալանավորումը, կիրառում ։ Փաստաբանը պնդում է՝ պատճառաբանությունը պետք է լինի հիմնավոր, մինչդեռ դատարանը նմանատիպ որևէ պատճառաբանություն չի ներկայացրել։

«Մեր բողոքը մերժելու մասին դատարանի որոշումը ստանալուց հետո միայն կորոշենք կբողոքարկենք, թե ոչ։ Այժմ հստակ չեմ կարող ասել։ Սակայն ունենք նաև գրավի միջնորդություն, որի քննարկումն այս պահի դրությամբ դեռ նշանակված չէ»,-հավելեց փաստաբանը։

Մեր այն հարցին, արդյոք Ռոբերտ Մանուկյանը իր նկատմամբ ոստիկանությունում բռնություն գործադրելու դեպքի առթիվ ՀՔԾ-ում հարուցված քրեական գործի շրջանակներում ճանաչվել է տուժող, թե ոչ, պաշտպանն արձագանքեց. «Պաշտոնապես տուժող չի ճանաչվել։ Մեղադրյալի կարգավիճակ ունի, քանի որ մյուս գործով ինքը մեղադրյալ է։ Բայց ըստ էության տուժող է»,-ասաց Հովսեփ Սարգսյանը։

Հիշեցնենք, որ Ռոբերտ Մանուկյանին ոստիկանները օգոստոսի 3-ին նրան տարել էին ոստիկանություն՝ արդարադատության իրականացմանն ու քննությանը խոչընդոտելու դրդչության կասկածանքով՝ առանց նրան ծանուցագիր ուղարկելու կամ բերման ենթարկելու որոշում ունենալու։ Ռ.Մանուկյանը հրաժարվել էր առանց օրինական հիմքի գնալ ոստիկանություն, սակայն նա հարկադրաբար տեղափոխվել է ոստիկանություն, որտեղ, ըստ նրա հայտարարության, ենթարկվել է բռնության։ Դատարանը նրա ձերբակալությունը ոչ իրավաչափ է համարել ու ազատել արգելանքից՝ արձանագրելով, որ «գործը վարույթ ընդունելուց քննիչի կողմից որեւէ հանձնարարություն չի տրվել կասկածյալին վարույթն իրականացնող մարմին ներկայացնելու համար, գործում չկա բերման ենթարկելու մասին որոշում կամ ծանուցագիր»։

Գործարար Ռ. Մանուկյանը իր նկատմամբ կիրառված բռնության վերաբերյալ հաղորդում էր ներկայացրել ՀՔԾ։ Նշանակված դատաբժշկական փորձաքննությամբ հաստատվել էր բռնության հանգամանքը։ Եզրակացությամբ փորձագետները Ռոբերտ Մանուկյանի մոտ ախտորոշել են կրծքավանդակի հետին պատի սալջարդ, վերին վերջույթների, գլխի փափուկ հյուսվածքների սալջարդեր։
Հիշեցնենք, որ Ռոբերտ Մանուկյանի նկատմամբ քրեական հետապնդում է հարուցվել Մելիք Մանուկյանի նկատմամբ կատարված սպանության փորձից հետո։

Հեղինակ` Հասմիկ Կոշկարյան