Փաստ ինֆո

ՊԵԿ նախկին նախագահ Գագիկ Խաչատրյանի ձերբակալությունը իրավաչափ նպատակ չի հետապնդում: Քիչ առաջ ԱԱԾ շենքի մոտ նման հայտարարությամբ հանդես է եկել Գ.Խաչատրյանի փաստաբան Երեմ Սարգսյանը` նշելով, որ պաշտպանական թիմը պատրաստվում է ձերբակալելու որոշումը բողոքարկել:

Փաստաբանը նշեց, որ օրենսդրությամբ նախատեսվում է անձին ձերբակալել՝ կանխելու համար հանցագործությունը կամ դրանից անմիջապես հետո հնարավոր փախուստը։ Մինչդեռ, ըստ փաստաբանի, ենթադրյալ չարաշահումները կատարվել են 2010, 2015-2016 թվականներին, այսինքն՝ ձերբակալությամբ դրանք կանխելու նպատակ չէր կարող դրվել: Բացի այդ` փախուստի կանխումը եւս չէր կարող դրվել ձերբակալության հիմքում, քանի որ նա ներկայացել է վարույթն իրականացնող մարմնին` առաջին իսկ կանչի դեպքում:

«Վարույթն իրականացնող մարմնի կանչով նա կիսատ է թողել իր բուժումը` Գերմանիայի Դաշնությունում ու  վերադարձել  Հայաստան` տեղյակ լինելով, որ իր վերաբերյալ  կոնկրետ քրեական գործ է քննվում: Ակնհայտ է, որ փախուստի նպատակ հետապնդողը Գերմանիայում չէր թողնի բուժումը ու չէր գա», - «Փաստինֆո»-ի փոխանցմամբ` ասաց Ե.Սարգսյանը` նշելով, որ մեկ այլ քրեական գործով, որը քննվում է ՀՔԾ վարությում, արդեն շուրջ վեց ամիս է, ինչ նա մեղադրյալի կարգավիճակ ունի ու նրա նկատմամբ որպես խափանման միջոց է ընտրվել ստորագրություն չհեռանալու մասին:

Նա տեղեկացրեց, որ Գագիկ Խաչատրյանն այսօր վաղ առավոտից մասնակցել է վերջինիս պատկանող բնակարաններում ԱԱԾ-ի կողմից իրականացված խուզարկություններին ու ինքն էլ ներկայացել ԱԱԾ, որպիսի պայմաններում, ըստ նրա, բերման ենթարկելու ձեւակերպումն արդարացված չէ:

Փաստաբանի փոխանցմամբ` խուզարկության արդյունքում առգրավվել են օրինական կարգով Գագիկ Խաչատրյանին պատկանող զենքեր: Ըստ նրա`  Խոշոր գումարներ չեն  հայտնաբերվել, միայն` «առօրյա գումարներ»։

Ինչպես արդեն տեղեկացրել ենք`այսօր վաղ առավոտից  խուզարկություններ են կատարվել ՀՀ պետական եկամուտների կոմիտեի նախկին նախագահ, ՀՀ ֆինանսների նախկին նախարար Գագիկ Խաչատրյանի, ինչպես նաև վերջինիս հետ փոխկապակցված մի շարք անձանց առանձնատներում և բնակարաններում։ 

Խուզարկությունների ավարտից հետո, Գագիկ Խաչատրյանը և Կարեն Խաչատրյանը (ՀՀ ՊԵԿ նախկին բարձրաստիճան պաշտոնյա) ՀՀ քրեական օրենսգրքի 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով նախատեսված հանցագործությունների (ծանր հետևանքների առաջացմամբ զուգորդված պաշտոնեական դիրքի չարաշահում և առանձնապես խոշոր չափերով գույքի վատնում) կատարման կասկածանքով բերման են ենթարկվել ՀՀ ԱԱԾ քննչական դեպարտամենտ և ձերբակալվել։

Աղբյուր` Փաստինֆո