Փաստ ինֆո

«Երևանի պաշտպանության ճակատի» համակարգող Բաբկեն Հարությունյանը հայց է ներկայացրել ընդդեմ Երեւանի քաղաքապետարանի։ Այդ մասին նա տեղեկացրեց այսօր տեղի ունեցած մամուլի ասուլիսում՝ ներկայացնելով Հայկ Մարությանի պաշտոնավարման այլընտրանքային հաշվետվությունը՝ հիմնված պաշտոնական գրությունների պատասխանների վրա: Նա նախ անդրադարձավ այն հայտարարությանը, որ Երևանի քաղաքապետարանի և Սանիթեքի միջև կքնված պայմանագրին վերաբերող իրենց հարցմանը չեն պատասխանել: Ասում է՝ իր նախորդ ասուլիսից, որը տեղի ունեցավ հենց Քաղաքապետարանի մուտքի առջև, մեկ-երկու օր հետո միայն պատասխանել են իր հարցմանը: Պատասխանը Հարությունյանին չի գոհացրել:

«Ես զարմանում եմ, որ քաղաքապետարանում մինչև հիմա աշխատում են մասնագետներ, որոնք կարող են նման բովանդակությամբ պատասխաններ գրել: Մենք, հղում անելով օրենքի կետին, ուղարկել ենք հարցում, մեզ պատասխանել են առանց հղման, առանց նշելու , թե ինչի հիման վրա են նման պատասխան գրել: Գրել են՝ քանի որ Սանիթեքի և Քաղաքապետարանի միջև կան որոշակի դատական գործընթացներ, որպեսզի հետագայում խնդիրներ չառաջանան, նպատակահարմար չենք համարում ձեր հարցմանը պատասխանել: Սա աբսուրդ է: Մարդիկ , ովքեր մեր միջոցներով այնտեղ նստած են, որոշում են ինչն է նպատակահարմար , ինչը՝ ոչ, առանց որևէ օրենքի հղում անելու: Ես ասել էի, որ սա անհետևանք չի մնալու և, մենք պատրաստել ենք դատական հայց և ուղարկել ենք դատարան: Ընթացիկ շաբաթվա ընթացքում , կարծում եմ, կունենանք որոշակի տեղեկատվություն: Քմահաճույքից ելնելով պատասխան են տվել: Կներեք, բայց դուք չեք որոշում ինչին ինչպես պատասխանել: Կա օրենք, որով պետք է գործեք: »

«Փաստինֆո»-ի հաղորդմամբ՝ Բ.Հարությունյանի հայցադիմումն ընդդեմ Երևանի քաղաքապետարանի՝ <<Սանիթեք>>, <<Սանիթեք Ինթերնեյշնլ>> ՍՊ ընկերությունների միջև կնքված պայմանագրերի պատճենները, տրամադրելուն պարտավորեցնելու պահանջի մասին դատարան մուտք է եղել օգոստոսի 19-ին, իսկ օգոստոսի 26-ին դատարանն այն վարույթ ընդունելու որոշում է կայացրել։

Հեղինակ` Անահիտ Հովհաննիսյան