Փաստ ինֆո

«Իր վերջին կարգադրությամբ, ԱԺ նախագահ Արարատ Միրզոյանը հաստատեց օրեր շարունակ իմ բարձրաձայնած խնդիրը, այն է՝ Ազգային Ժողովում տեղի են ունենում զանգվածային ազատումներ ՝ օրենքի խախտմամբ»,- «Փաստինֆո»-ի հետ զրույցում մեկնաբանելով ԱԺ նախագահ Արարատ Միրզոյանի ՝ Կ-233-Ա կարգադրությունը, ասաց ԱԺ աշխատակազմի ղեկավարի նախկին տեղակալ Արսեն Բաբայանը:

Հիշեցնենք, կարգադրությամբ, ԱԺ նախագահն, ըստ էության, ընդունել է, որ հուլիս ամսվանից խախտվել են ԱԺ-ի տասնյակ աշխատակիցների աշխատանքային իրավունքները, որոնք անհիմն ազատվել են աշխատանքից։ Խոսքը ԱԺ հին աշխատակիցների մասին է:
«Ամեն անգամ խնդիրը բարձրացնելիս ես նշում էի, որ տեղի է ունեցել մարդու իրավունքների մասսայական ոտնահարում, իսկ նման դեպքերում մարդու իրավունքների մասսայական խախտման հեղինակները պետք է «վռնդվեն» աշխատանքից: Հիմա, փաստացի, ԱԺ նախագահը, ընդունելով, որ խնդիր կա, ավելի խճճեց իրավիճակը»:

ԱԺ նախագահի կարգադրության մեջ, հիշեցնենք, առանձին կետով նշվել է, որ պետք է հրապարակվեն՝ ՀՀ Ազգային ժողովի նախագահի 2019 թվականի հուլիսի 13-ի «Հայաստանի Հանրապետության Ազգային ժողովի աշխատակազմում պետական ծառայության պաշտոնների անվանացանկը հաստատելու մասին» Կ-218-Ա եւ «Հայաստանի Հանրապետության Ազգային ժողովի աշխատակազմի հաստիքացուցակը հաստատելու մասին» Կ-219-Ա կարգադրությունների (այսուհետ՝ Կարգադրություններ) հավելվածները, այնուհետև՝ ընդունման պահից անվավեր ճանաչել Կարգադրությունների հիման վրա Տիգրան Գալստյանի ընդունած հրամանները՝ օրենքով սահմանված կարգով լուծելով մինչեւ դրանց ընդունումը եղած իրավական վիճակի վերականգնման հետ կապված հարցերը։ Արարատ Միրզոյանն անվավեր է ճանաչել մի քանի վարչության պետի աշխատանքից ազատելու մասին իր ավելի վաղ կարգադրությունները:

Ըստ Բաբայանի, նախ, մինչեւ այս կարգադրությունը, պետք է զբաղեցրած պաշտոններից ազատվեին ԱԺ աշխատակազմի ղեկավարն ու նրա տեղակալները եւ բոլոր նրանք, ովքեր որեւէ առնչություն են ունեցել այդ գործընթացներին : «Իր կարգադրությամբ ԱԺ նախագահը հաստատեց, որ իր նախկին՝ առնվազն 2-3 կարգադրություններն ստորագրելիս չի իմացել, թե ինչ է ստորագրում, այսինքն, ինչ դեմ են տվել, ստորագրել է, եւ հիմա փորձ է արվում իբր թե վերականգնել մարդկանց խախտված իրավունքները, ինչը գրեթե անհնար է վերականգնել առանց հետեւանքների եւ, ստացվում է, որ նրանց իրավունքները կրկին խախտվում են»,-նշեց Արսեն Բաբայանը՝ մանրամասնելով, որ եղել են մարդիկ, որոնք օրինակ` այլ աշխատանքի են ընդունվել կամ երկրից դուրս են եկել երկարատեւ հանգստի եւ այժմ հարց է, թե այդ մարդկանց ինչպե՞ս պետք է գտնեն եւ հետ կանչեն կամ արդյո՞ք նրանք պարտավոր են գալ եւ կրկին աշխատել ԱԺ-ում:

«Այս հարցերից բացի կա ամենագլխավոր հարցը, եթե իսկապես ազատումներն անվավեր ճանաչվեն, ԱԺ –ի ղեկավարությունն ինչպե՞ս է պատկերացնում այդ մարդկանց հետ աշխատանքը, նրանք ինչպես են աշխատելու աշխատակազմի ղեկավարի հետ, որը մարդու իրավունքների մասսայական խախտումներ է թույլ տվել: Խնդիր է նաեւ այն, թե ինչ են անելու այն մարդկանց հետ, որոնց աշխատանքի էին ընդունել, որովհետեւ ի սկզբանե ակնհայտ էր, որ ազատումներն ու նշանակումներն ապօրինի են, գոնե նշանակումները չպետք է անեին»:
ԱԺ աշխատակազմի ղեկավարի նախկին տեղակալի խոսքով, փաստորեն, ստացվել է մի իրավիճակ, որ աշխատանքի ընդունվելուց 20 օր անց վերջիններս անհասկանալի իրավիճակում են հայտնվել: Սա, Բաբայանի խոսքով, փաստում է, որ մարդը ԱԺ աշխատակազմի համար պարզապես որեւէ արժեք չի ներկայացնում. «Այսինքն, կարող են գրչի մեկ հարվածով ազատել մարդուն աշխատանքից, մեկ այլ նշանակում անել, հետո ասեն՝ հետ եկեք: Արարատ Միրզոյանի կարգադրությունից հետո խնդիրը էլ ավելի է խորացել, մարդկանց հետաքրքրում է հարցը, թե ին՞չ է լինելու իրենց հետ: Աշխատանքից ապօրինի ազատված մարդիկ 10-ը, 20 տարա փորձ ունեցող պրոֆեսիոնալներ են, դրված է նաեւ նրանց արժանապատվության հարցը»:

Բացի այս խնդիրներից, ԱԺ աշխատակազմում ստեղծված խառնաշփոթ իրավիճակը նաեւ լուրջ ֆինանսական բեռ է ստեղծելու բյուջեի համար: «Չէ՞ որ վերջնահաշվարկներ են արվել, մարդկանց գումար է վճարվել, նոր աշխատողները 20 օր աշխատել են , նրանց պետք է վճարել: Եթե այս ամենը հաշվենք, բավականին մեծ գումար է ստացվում»,-ասաց Բաբայանը:

Ըստ նրա, կարող ենք փաստել, որ այս պահին գործող ԱԺ աշխատակազմը կոմպետենտ չէ եւ ի վիճակի չէ լուծել խնդիրները ՝ թե մասնագիտական , թե բարոյական առումներով. «Կարծում եմ՝ պետք է դուրս գալ անձնական կոմպլեքսներից եւ լսել մարդկանց, որոնք օգնելու փորձ են անում: Ես համոզված եմ, որ Արարատ Միրզոյանի խնդիրն իր աշխատակազմն է, փաստացի ԱԺ նախագահի աշխատակազմը ԱԺ նախագահին դրել է վատ վիճակի մեջ»:

Նախկին պաշտոնյան , բացի վերը նշվածից մի կարեւոր հանգամանք էլ է առանձնացնում. ԱԺ նախագահ Արարատ Միրզոյանի հիշյալ կարգադրությունը Երրորդ Հանրապետության պատմության մեջ աննախադեպ է նաեւ շարադրանքի ոճի առումով, որովհետեւ պահպանված չեն իրավական ակտին ներկայացվող չափանիշները: « Իրավական ակտը շարադրության տեսքով է գրված, մինչդեռ իրավական ակտերի լեզուն հստակ սահմանված է օրենսդրությամբ եւ զուտ մասնագիտորեն սա էլ է ցույց տալիս, թե որքան լուրջ է խնդիրը», -ասաց Արսեն Բաբայանը:

Աղբյուր` Փաստինֆո