Փաստ ինֆո

Հայաստանում ամենամեծ խնդիրը ոչ թե քաղցկեղի հիվանդությունն է, այլ այն ուշ ախտորոշելը, ինչի հետևանքով կորցնում ենք հիվանդներին։ «Փաստինֆո»-ի հետ զրույցում այս կարծիքը հայտնեց ուռուցքաբան, Առողջապահության ազգային ինստիտուտի ուռուցքաբանության ամբիոնի վարիչ Վահե Տեր-Մինասյանը։
Վերջինս ընդգծեց, որ այսօր Հայաստանում քաղցկեղով հիվանդությունների 50 տոկոսից ավել դեպքերում գրանցվում է երրորդ-չորրորդ փուլ. «Ամբողջ աշխարհում միջինը հաշվվում է, որ տարեկան 1.5-ից 4 տոկոսով ավելանում է քաղցկեղային հիվանդությունների քանակը։ Դա նորմալ է, որովհետև կան կլիմայական, սննդի փոփոխություններ և բազմաթիվ այլ գործոններ, ուստի քանակը շարունակելու է շատանալ։ Սակայն դրան զուգահեռ պետք է կարողանալ նվազեցնել մահացությունը»,-ասաց բժիշկը։

Վերջինս քաղցկեղի հետևանքով մահացության բարձր ցուցանիշը պայմանավորեց բարձիթողությամբ։ Հայաստանում հիվանդների մոտ ուռուցքը հայտնաբերվում է ուշ փուլում. «Պայմանական կարող ենք ասել, որ եթե հիվանդությունը հայտնաբերվում է զրոյական փուլում, ապա պրակտիկորեն 100 տոկոս բուժում ենք, եթե հիվանդությունն առաջին փուլում է, կախված ուռուցքի տեսակից՝ շանսերը տատանվում են 85-ից 90 տոկոսի սահմաններում։ Երկրորդ փուլում դա արդեն 65-75 տոկոս է, իսկ չորրորդ փուլում գրեթե բոլոր հիվանդներին կորցնում ենք»,-ասաց ուռուցքաբանը։

Նրա խոսքով, եթե անդրադառնանք բուժման մեթոդներին, դեղորայքին, ճառագայթային թերապիային, ապա այստեղ էլ կտեսնենք խնդիրներ. «Կարծում եմ աշխարհում չկա մի երկիր, որ ուռուցքային հիվանդների բուժման հետ ֆինանսական խնդիր չունենա, որովհետև միշտ էլ կարելի է ավելի լավ, ավելի թանկ մեթոդ գտնել։ Ցավոք, Հայաստանն այսօր չի կարող այդ ամենն ամբողջությամբ պետական մակարդակով փակել»,- նկատեց Վահե Տեր-Մինասյանը՝ հավելելով, որ, այնուամենայնիվ, տեսնում է առաջխաղացում, դրական քայլեր, սակայն այն, որ հսկայական ճանապարհ ունենք անցնելու, դա փաստ է։
Ինչևէ Հայաստանի միջին վիճակագրությունը ուռուցքաբանի վստահեցմամբ համապատասխանում է ամբողջ աշխարհի վիճակագրությանը։
Հարցին արդյո՞ք կա վիճակագրություն, թե առավելագույնը որ տարիքում է քաղցկեղի առաջացման հավանականությունը, ուռուցքաբանը նկատեց, որ վիճակագրությունը տարբեր է՝ կախված լոկալիզացիայից։

«Կան տարբեր տեսակի ուռուցքներ։ Դիցուք չենք կարող համեմատել կանանց գինեկոլոգիական քաղցկեղը։ Կան ուռուցքներ, որոնք ավելի վաղ տարիքում են առաջանում և կան որ ավելի ուշ տարիքում։ Կարող ենք ենթադրենք ասել, որ տարեկան ունենում ենք 7.5-8 հազ դեպք, հաշվենք միջին տարիք, սակայն չգիտեմ՝ դա որքանով է ճիշտ»,-հավելեց բժիշկը։

Աղբյուր` Փաստինֆո