Փաստ ինֆո

Ալավերդի-Բագրատաշեն միջպետական ճանապարհը՝ Արճիս գյուղի հատվածում, այսօր առավոտից փակ է։ Գյուղի բնակիչները բողոքում են գյուղում ջրի բացակայությունից․ խմելու ջրի մատակարարում գյուղում չկա։

«Փաստինֆո»-ի հետ զրույցում բողոքի ակցիայի մասնակիցներից մեկը՝ Արտաշը, ով գյուղի բնակիչ է, նշեց, որ բողոքի ակցիան նախաձեռնել են բոլոր արճիսցիները, ովքեր այս պահին այնտեղ են։ Մասնակցի խոսքով՝ իրենք մոտ 300 հոգի են․«Մեր խնդիրը նրանում է, որ Արճիս համայնքը խմելու ջուր չունի։ Ջրագիծը գնում է մեր գյուղի տարածքով, ընդամենը պետք է երկու կիլոմետր ջրագիծ կառուցվի, պոմպակայանով հասցվի գյուղի վերեւում գտնվող լողավազաններին, լցվի այդտեղ եւ ներքին ցանցով բաշխվի»։

Գյուղի բնակչի խոսքով՝ վերջին երկու տարում ձյուն ու անձրեւ չի եկել, ջրերը լրիվ կտրվել են, իսկ մինչ դա աղբյուրներ են ունեցել, որոշակի չափով դրանցից օգտվել են, բայց դրանց ջուրն էլ խմելու չէր։ Այսօր արդեն ոչ մի տեսակ ջուր չունեն՝ ոչ խմելու, ոչ լողանալու, ոչ ոռոգման․«Գյուղի ներքին ցանցը անցյալ տարի ամբողջովին սարքվել է, բայց ջրի հարցը չի լուծվել։ Խնդիրը ներկայացված է եղել դեռեւս նախորդ մարզպետի ժամանակ՝ հեղափոխությունից հետո՝ մայիս ամսին, մարզպետարանը տեղյակ է եղել եւ մի տարի երկու ամիս, կարելի է ասել, ոչինչ չի արվել։ Երկու ամիս առաջ եկանք այստեղ, որ գյուղի տակից ջուր տանենք, մարզապետարանից մարդիկ եկան, պայմանավորեցինք, որ հաջորդ օրը կգան, նախագիծ կկազմեն, նախահաշիվ կանեն, կներկայացնեն Կառավարություն։ Այդ ամենը տեւեց մեկ ամիս քսան օր։ Ողջ ընթացքում մեզ պատասխան էր գալիս, որ հարցը կմտցվի օրակարգ, ֆինանսավորումը կհաստատվի։ Բայց երկու անգամ էլ խաբեցին․օրակարգ չմտցվեց, ֆինանսավորումը չհաստատվեց»։

Բնակչի խոսքով՝ դրանից հետո մարզպետարանից ասացին, որ իրենցից ինչ հասնում է, արել են, բայց ֆինանսավորում չկա․ «Ասացին, որ սեպտեմբեր ամսվա վերջին հնարավոր է՝ կառավարությունում ֆինանսավորման վերաբաշխում լինի, ու ֆինանսական միջոցներ հատկացնեն։ Բայց հասկանո՞ւմ եք՝ դա ինչքանով որ հնարավոր է, նույնքանով էլ հնարավոր չէ։ Եվ հետո, եթե անգամ այդ միջոցները հատկացնեն, դա ամիսներ է տեւելու․ մի ամիս՝ տենդերին, երեք ամիս՝ շինարարությանը․․․»։

Ակցիայի մասնակիցները նշում են՝ իրենց պահանջը Կառավարությունից այն է, որ ուղիղ եթերով կամ այլ եղանակով արձագանքեն, ասեն, որ հարցը կընդգրկվի օրակարգում եւ Կառավարության առաջիկա նիստին ֆինանսավորումը կհատկացվի․ «Երկրորդ պահանջն էլ այն է, որ եթե անգամ առաջին պահանջը կատարվի, այդ 4-5 ամսվա մեջ, մինչեւ ծրագիրը կիրականացվի, մարզպետարանի, համայնքապետարանի միջոցներով «Վիոլա ջուրը» ջրատար մեքենա վարձի, 100 տոննա ջրի չափով հասցվի այդ լողավազանները, որ մարդիկ առանց ջուր չմնան»։

Ակցիայի մասնակիցները նշում են, որ երկու ժամից ավել է՝ ճանապարհը փակ է, բայց որեւէ արձագանք չկա․ «Ասացին, որ մարզպետն է գալիս, բայց դրանում մենք որեւէ լուրջ բան չենք տեսնում, որովհետեւ մարզպետարանը իր ձեռքից եկողը արել է, նախագիծը կազմել է, նախահաշվարկն արել է, հիմա գալու է՝ ի՞նչ անի։ Այս ընթացքում Կառավաարության պատասխանատու անձանցից մեկը կարող էր որոշում կայացնել, հարցը մտցնել առաջիկա նիստի օրակարգ եւ ճանապաարհն էլ էլ չէր փակվի»,- մեզ հետ զրույցում նշեց գյուղի բնակիչներից Արտաշը։

Ակցիայի մասնակիցների խոսքով՝ մեքենաների շարասյունը գնալով շատանում է։ Նրանք նշում են, որ ճանապարհը փակ է մնալու այնքան ժամանակ, քանի դեռ պատկան մարմիններից որեւէ արձագանք չի եղել։

Լուսանկարները՝ Գարիկ Միսկարյանից

Հեղինակ` Միլենա Խաչիկյան