Փաստ ինֆո

Օտարերկրյա հիմնադրամներց սնվող հասարակական կազմակերպություններին Արցախում դիտորդական առաքելություն իրականացնելու նպատակով ՀՀ պետբյուջեից գումար հատկացնելու՝ կառավարության աննախադեպ քայլը  Ստեփանակերտում հայտնի հանրահավաքի ժամանակ ՀՀ վարչապետ Նիկոլ Փաշինյանի արած հայտարարության արտացոլումն է, թե Հայաստանը դառնալու  է Արցախում ժողովրդավարական  ընտրությունների երաշխավորը: «Փաստինֆո»-ի հետ զրույցում նման կարծիք հայտնեց քաղաքագետ Վիգեն Հակոբյանը:

Հիշեցնենք, որ օգոստոսի22-ի  կառավարությաննիստում ընդունվեց որոշում, որով Արցախում 2019թ. սեպտեմբերին ՏԻՄ ընտրություններին քաղաքացիական հասարակության կողմից ընտրություններին դիտորդական առաքելության իրականացման հարցում աջակցություն ցուցաբերելու նպատակով՝ ՀՀ վարչապետի աշխատակազմը պարտավորվում է 2019 թվականի ինն ամսում հատկացնել 33,680.0 հազ.դրամ «Իրազեկ քաղաքացիների միավորում» հասարակական կազմակերպությանը և «Թրանսփարենսի ինթերնեշնլ» հակակոռուպցիոն կենտրոնին։

«Երբ այդ միտքն ասվեց, իհարկե, դժվար էր կանխատեսել, որ այդ նպատակի բաղկացուցիչ մասերից մեկը կարող է լինել դրսից ստեղծված եւ ֆինանսավորվող կազմակերպություններին օժանդակություն տալը, որովհետեւ շատ ավելի տրամաբանական ու ընկալելի կլիներ, եթե  այդ օժանդակությունը տրամադրվեր Արցախում գործող ՀԿ-ներին, որոնք որեւէ կապ չունեն Արցախի իշխանությունների հետ»,-նշեց քաղաքագետը:

Դիտարկմանը, թե կարծիքներ են հնչում, որ Հայաստանի միջոցով Սորոսը մտնում է Արցախ, քաղաքագետն արձագանքեց. «Հենց այդպես էլ ստացվում է, այլ կերպ դա դժվար է գնահատել, դա նույնիսկ քննարկման խնդիր չէ, դա փաստ է: Սա, մեղմ ասած, անսովոր որոշում էր»:

Ըստ քաղաքագետի, այս պարագայում, առավել հետաքրքիր է լինելու Արցախի ղեկավարության վերաբերմունքը. « Ենթադրենք, այդ կազմակերպություններն Արցախում զբաղվում են  այն ամենով, ինչով սովորաբար զբաղվում  են  եւ եզրակացություններ են անում : Ի՞նչ նշանակություն է ունենալու այդ  եզրակացությունը Արցախի իշխանությունների համար,  ինչպե՞ս կգնահատի Արցախի ղեկավարությունն այս քայլը՝ որպես վերհսկողությա՞ն, երաշխավորությ՞ան, թե՞ ճնշման քայլ»:

Վիգեն Հակոբյանը հիշեցրեց, որ իշխանափոխությունից հետո ՀՀ-Արցախ փոխհարաբերությունները շատ բարդ փուլեր անցան: Ըստ նրա, այժմ նույնիսկ դժվար է գնահատել, թե ինչ փուլում են այդ հարաբերությունները: «Բավականին ռիսկային էր հայտարարությունը, թե Հայաաստանը կդառնա Արցախի ընտրությունների երաշխավոր, որովհետեւ, եթե խոսք էր գնում երաշխիքների մասին, ապա անվտանգությունը նկատի ունեինք, մինչդեռ Արցախում բազմաթիվ համապետական եւ տեղական  ընտրություններ են անցել, որոնց մասնակցել են բազմաթիվ դիտորդական կազմակերպություններ ու անհատ դիտորդներ եւ ընդհանուր առմամբ, այդ ընտրություններն ընկալվում եւ ընդունվում էին որպես  միջազգային ժողովրդավարական սկզբունքներին համապատասխանող եւ կասկածներ առանձնապես չէին առաջացնում: Հիմա Հայաստանի իշխանությունը մի կողմից պնդում է, որ փորձում է բարձրացնել Արցախի սուբյեկտությունը, մյուս կողմից, քայլեր է անում, որոնք այդ տրամաբանությանը դեմ են»:
Վիգեն Հակոբյանի խոսքով, կառավարությունն այս քայլով բացի ներացախյան խնդիրներից նաեւ ներհայաստանյան խնդիրներն է փորձում լուծել եւ , ըստ էության նման վերաբերմունքով գուցե ակնկալիքներ ունի, որ այդ կազմակերպությունները եթե ոչ լոյալություն կդրսեւորեն,  ապա գոնե փոքր-ինչ կմեղմացնեն իրենց դիրքորոշումը ներհայաստանյան ներքին խնդիրներում, այդ թվում՝ բնապահպանական:

«Սա ավելի մեծ խաղի էլեմենտ է եւ ներհայաստանյան նպատակներ էլ է հետապնդում»,-կարծում է Վիգեն Հակոբյանը՝ չբացառելով, որ Հայաստանի կառավարության որոշմամբ վարչապետ Փաշինյանը նաեւ ուղերձ է հղում հենց Սորոսի հիմնադրամին: «Սա որոշակի մեսիջ կարող է պարունակել, որ Հայաստանի իշխանությունը , ի հեճուկս մամուլում եղած վերլուծությունների, թե  լուրջ պրոբլեմներ կան քաղաքական վերնախավի ու այդ նույն հիմնադրամի միջեւ, չի համարում, որ այդ հակասությունները, որոնք եթե կան էլ , անհաղթահարելի են: Մենք տեսնում ենք, որ  ժամանակ առ ժամանակ ինչ-որ խնդիրներ առաջանում են, որոշ մարդկանց՝ կոնկրետ քրեական գործերի հետ կապված, բնապահպանական  խնդիրների հետ կապված, իսկ հետագայում հնարավոր է՝ նաեւ  Ստամբուլյան կոնվենցիայի հետ կապված»,-եզրափակեց քաղաքագետը:

Աղբյուր` Փաստինֆո