Փաստ ինֆո

«Փաստինֆո»-ի հաղորդմամբ՝ ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության նախկին պետՎահագն Մուրադյանը դատական հայց է ներկայացրել ընդդեմ Գլխավոր դատախազության՝ պահանջելով վերացնել իրեն ՀԿԳ քննության նկատմամբ հսկողության վարչության ղեկավարի պաշտոնից փոխադրելու և ՀՀ զինվորական դատախազի տեղակալի պաշտոնում նշանակելու մասին ՀՀ գլխավոր դատախազի 29.08.2018թ. թիվ 286-Ա հրամանը։

Հիշեցնենք, որ նրա փոխադրումը տեղի է ունեցել դեռեւս մեկ տարի առաջ՝ ՀՀ գլխավոր դատախազ Արթուր Դավթյանի 2018 թվականի օգոստոսի 29-ի թիվ 286-Ա հրամանով։ Այս մեկ տարվա ընթացքում նշված որոշումը վիճարկվել է մի քանի անգամ։ Այս ընթացքում հրամանի կատարումը կասեցվել էր եւ Վ.Մուրադյանը շարունակում էր կատարել վարչության պետի պարտականությունները։ Օգոստոսի 22-ին հայտնի դարձավ, որ Գլխավոր դատախազ Արթուր Դավթյանի հրամանով Գլխավոր դատախազությունում հատկապես կարևոր գործերով քննության նկատմամբ հսկողության վարչության պետի պաշտոնում նոր նշանակում է կատարվել եւ պետ է նշանակվել մինչ այդ Լոռու դատախազի պաշտոնը զբաղեցրած Արսեն Մարտիրոսյանը:

Դատական տեղեկատվական համակարգից «Փաստինֆո»-ն տեղեկացավ, որ մինչ այս նշանակումը Վահագն Մուրադյանը նոր հայց էր ներկայացրել վարչական դատարան՝ ընդդեմ գլխավոր դատախազի։ Հայցադիմումը դատարան է մուտք եղել օգոստոսի 13-ին եւ մակագրվել դատավոր Միքայել Մելքումյանին։ Հայցվորը միաժամանակ միջնորդել է հարգելի համարել հայց ներկայացնելու համար բաց թողնված դատավարական ժամկետը և վերականգնել այն։ Միջնորդությամբ հայցվորը հայտնել է, որ իր իրավունքների վերականգնման համար նույնաբովանդակ հայցով ժամանակին դիմել է ընդհանուր իրավասության դատարան, հայցն ընդունվել է վարույթ և միայն ՀՀ վերաքննիչ քաղաքացիական դատարանի կողմից է մեկնաբանվել, որ սույն հայցն ընդդատյա է ՀՀ վարչական դատարանին, ինչի պատճառով հայցվորը բաց է թողել ժամկետը: Հայցվորի այս միջնորդությունը դատարանը բավարարել է օգոստոսի 21-ին։

Գործով դատական նիստ է նշանակվել հոկտեմբերի 1-ին։

Աղբյուր` Փաստինֆո