Փաստ ինֆո

«Ամուլսարի հետ կապված իմ տեսակետը շատ պարզ ու հստակ է, ես հարցնում եմ կարո՞ղ է վտանգ լինել այսինչ խնդրից, եթե կարող է վտանգ լինել մեր ժողովրդի, մեր ժողովրդի տան՝ հայրենիքի համար, ապա դա բացառվում է»,-այսօր լրագրողների հետ զրույցում ասել է  Ազգային ինքնորոշում միավորում կուսակցության առաջնորդ Պարույր Հայրիկյանը, անդրադառնալով Ամուլսարի հանքի շահագործմանը։

Նա նշել է, որ կյանքն ամենակարևոր բանն է և պետք է պատրաստ լինել վճարել ապրելու իրավունքի համար, ապա հավատացրել, որ այս պահին նման խնդիր Հայաստանը չունի։

«Այն, որ ստորաբար վախեցնում են մեզ, որ համաձայնագրեր կան, կարող ես ասել հեղափոխություն ես արել և ինչպես Իսլանդիայում հեղափոխություն էր եղել և դրանից առաջ եղած բոլոր սխալ պայմանագրերը չեղարկվել էին»,-ասել է Հայրիկյանը։

ԱԻՄ առաջնորդի խոսքով, եթե «Լիդիան»-ը լուրջ կառույց լիներ հայկական բանկերից պարտքով գումար չէր ստանա։

Խոսելով Ամուլսարի հարցը հանրաքվեով լուծելու մասին, Հայրիկյանն ասել է, որ դա առողջ տարբերակ է, սակայն նման հարցերը լուծվում են մասնագիտորեն։

«Ես այսօր մի այսպիսի օրինակ եմ բերել. Մեկի սիրտը վատ է, պետք է վիրահատեն, մյուսներն էլ ասում են պետք չէ վիրահատել, կարո՞ղ է դրա համար հանրաքվե դրվի, հավաքվում են մասնագետներն ու որոշում  ընդունում»,-նշեց Հայրիկյանը։

Ամփոփելով  իր խոսքը, ԱԻՄ առաջնորդն ասաց, որ  մասնագիտական հարցերում մարդկանց վրա բեռ դնելն ինչ-որ տեղ նույնիսկ անպարկեշտություն է։

Հեղինակ` Սոնա Գեւորգյան