Փաստ ինֆո

Վարչապետը Ջերմուկում տնետուն՝ բնակիչների դռներն է թակում ու հարցնում, թե ինչպե՞ս են տրամադրված Ամուլսարի շահագործման հարցին:
«Արմենիա»  առողջարանում աշխատող բուժքույրը առանց սեթևեթանքի,  ուղղակի անկեղծ պատասխանում է, որ ինքը դեմ է: Ն. Փաշինյանը, թե՝ իսկ եթե պարզվի, ապացուցվի, որ անվնա՞ս է:

Բայց Ջերմուկի բնակչուհին, որ նաև բուժքույր է,  շատ վստահ ու համոզված ՀՀ վարչապետին ասում է՝ ամեն դեպքում՝ չպետք է շահագործվի, քանի որ Ջերմուկը կուրորտային քաղաք է, իսկ առողջարանային քաղաքը և հանքավայրը մեկտեղ, նույն տարածքում, նույն մթնոլորտում չեն կարող լինել:

Պարզ, մարդկային, ազատ այսպես  արձագանքելը բանական և բնական մարդուն է հատուկ, որը ցանկացած պարագայում կեղծել չի կարող, իր հստակ տեսակետն ունի և այն չի կարող փոխվել ոսկի-արծաթով:

Իսկ դրսում ժողվուրդը արդեն միտինգային տրամադրությամբ է լի՝ Ամուլսարն առանց հանքի կարգախոսով:

Մեկ էլ՝վարչապետին մի տիկին է մոտենում, Ջերմուկի նախկին բնակիչ, որը ԱՄՆ-ից եկել՝ տուն է գնել, որ ապրի էկոլոգիապես մաքուր Ջերմուկում: Ընկերներն էլ սպասում են իր կանչին: Եկել, նորոգել է իր տունը, որի լուսամուտից Փաշինյանը նայում է ու չգիտի՝ իր դիմացի սարը Ամուլսարն է, թե՞ …

-Մի րոպե, ո՞րն է Ամուլսարը ստեղ…

Իսկ ԱՄՆ-ից Ջերմուկ վերադարձած տիկինը, որն արդեն մի տեսակ կամուկացի մեջ է՝  վարչապետին պատմում է, թե սարն այսօր արդեն փոշու ի՜նչ ամպեր է տարածում: Հետո մեկ ուրիշն է խոսում, նա էլ՝ Բեյրութից Ջերմուկ եկած… մարդիկ եկել-մեկտեղվել են իրենց մաքուր-առողջարանային քաղաքում, բայց արդեն վարանմունքի մեջ են՝ եկել են հանքավայր, թե՞  Ջերմուկ առողջարանային կենտրոն:

Իսկ վարչապետը՝ եթե պարզվի, եթե ապացուցվի… Եղբայր, ապացուցելու կարիք չունի անապացուցելին, աքսիոմատիկ ճշմարտությունը, այն, որ կուրորտը հանքավայր չի կարող լինել: Մարդիկ դա հասկացել են, դու ո՞նց չես հասկանում: Եթե պարզվի, եթե պարզվի, եթե պարզվի… եթե հիմնավորվի, եթե ապացուցվի…

Պարզ է, հիմնավոր է, տրամաբանական է: ՈՒղղակի խնդիրը պիտի հասկանալ, իսկ երկրի վարչապետը սկսված պրոցեսն ամեն կերպ ավարտելու հանձնարարություն է ստացել: Եվ շատ է ուզում, որ կատարի այդ հանձնարարությունը: Այսքան բան:

Նրան չեն հասկանում մեր քաղաքացիները, որքան էլ բարձր ձայնով վստահեցնի, թե ինքը շահ չունի այստեղ:

Հայաստանի Հանրապետության հավասարակշռված շահ… շարունակ կրկնում է վարչապետը: Եվ այդ շահն է որոնում:

Հավասարակշռված բառն այստեղ լրիվ ավելորդ է: Հայաստանի շահ, երկրի շահ…

ՈՒղղակի լսել է պետք մասնագետների խոսքը՝ Նազելի Վարդանյանի, Հակոբ Սանասարյանի…

Մի րոպե, ո՞րն է Ամուլսարը ստեղ՝ հարցնում է լրագրողական ի՛ր  հետաքննությունն իրականացնող  վարչապետը՝ ՀՀ հավասարակշռված շահի կողմնակից…

ՈՒ ցավ ես ապրում պետությանդ համար,  իր երկիրն անմնացորդ  սիրող ղեկավարի  կարոտ՝ երկրիդ համար…

Ա. Ե.

Աղբյուր` Փաստինֆո