Փաստ ինֆո

Պետական համակարգում կոռուպցիոն մեխանիզմների դեմ պայքարի առաջամարտիկ, ընդդիմադիր պատգամավոր  Նիկոլ Փաշինյանը և արդեն պետական այր Նիկոլ Փաշինյանն իր վարչապետության արշալույսին պետհամակարգում տիրող արատավոր երևույթների ցանկը սկսում և ավարտում էր  գնումների կազմակերպման և մրցույթների իրականացման մեխանիզմներում կոռուպցիոն գործընթացների մասին խոսելով և դրանք բացահայտելու պատրաստակամությամբ:

Սակայն, վարչապետի խոսքը նախորդ ողջ ընթացքում ոչ միայն գործի չի վերածվել, այլև բոլորիս աչքի առաջ նոր իշխանությունները մրցույթները վերածել են խնամի-ծանոթ-բարեկամների միջև բաժանելու գործընթացի: Այս համատեքստում մրցույթներ ունենք, որոնց օրինակ, հինգ րոպե մրցույթից առաջ ստեղծված ԱՁ կարող է մասնակցել, ու հետո կպարզվի, որ ՔՊ-ական ակտիվիստների ընկեր-բարեկամ-ուհիներն են դրանք, որ եկան ու մեկեն հաղթեցին: Այս նույն համատեքստում եկան ու անցան էլ Քաղաքացու օր, էլ Վարդավառի տոն, որոնց շրջանակում պետական հիմնարկները մասնակցային ապահովում ցուցաբերեցին, բայց, ընկեր-բարեկամ, քավոր- սանիկներն ու նրանց ուհիները շահեցին: 
Թարմ օրինակը հենց այսօր տեղի ունեցավ՝ վերջին կառավարության նիստի ընթացքում, երբ երկրի պահուստային ֆոնդից հսկայական գումար հատկացվեց երկու սորոսական կազմակերպության, որ վերջիններս, ոչ դես, ոչ դեն, որպես դիտորդներ Արցախի ժողովրդի ազատ կամարտահայտությանը նպաստեն սեպտեմբերին Արցախում տեղի ունեցող ՏԻՄ ընտրությունների ժամանակ:

Մեջբերում ՀՀ կառավարության նիստից

2019 թ-ի օգոստոսի 22-ին կայացած  Կառավարության նիստի ընթացքում  ընդունվեց «Հայաստանի Հանրապետության 2019 թվականի պետական բյուջեում և Հայաստանի Հանրապետության կառավարության 2018 թվականի դեկտեմբերի 27-ի N 1515-Ն որոշման մեջ փոփոխություններ ու լրացումներ կատարելու և Հայաստանի Հանրապետության վարչապետի աշխատակազմին գումար հատկացնելու մասին» ՀՀ Կառավարության որոշումը Որոշման համաձայն՝ Արցախում 2019թ. սեպտեմբերին տեղական ինքնակառավարման մարմինների (ՏԻՄ) ընտրություններին քաղաքացիական հասարակության կողմից ընտրություններին դիտորդական առաքելության իրականացման հարցում աջակցություն ցուցաբերելու նպատակով՝ ՀՀ վարչապետի աշխատակազմը պարտավորվում է 2019 թվականի ինն ամսում հատկացնել 33,680.0 հազ. դրամ «Իրազեկ քաղաքացիների միավորում» հասարակական կազմակերպությանը և «Թրանսփարենսի ինթերնեշնլ» հակակոռուպցիոն կենտրոնին։ Համապատասխանաբար՝ 16,200.0 հազ. դրամ և 17,480.0 հազ. դրամ տրամադրելու նպատակով՝ Հայաստանի Հանրապետության 2019 թվականի պետական բյուջեով նախատեսված Հայաստանի Հանրապետության կառավարության պահուստային ֆոնդի հաշվին (բյուջետային ծախսերի տնտեսագիտական դասակարգման «Այլ ընթացիկ դրամաշնորհներ» հոդվածով):

Փաշինյանը՝ Սորոսի հետ՝ ուս-ուսի

Շատ ուշագրավ իրավիճակ է։ Փաստորեն, հայրենի կառավարությունը որոշել է այլևս նեղություն չտալ պարոն Սորոսին՝ հարկատուներիս հաշվին ապահովելով  իր սորոսական աջակից կազմակերպությունների ֆինանսավորումը։ Դեռ  մի կողմ դնենք  Արցախի Հանրապետության ներքին գործերին միջամտելու՝ ՀՀ կառավարության ակնհայտ փորձերը, կամ Արցախի Հանրապետության ներքին գործերին միջամտելուն միտված՝ այլ կազմակերպությունների ֆինանսավորումը, կամ որ ավելի վատ է և արդեն ոչ աննախադեպ՝ պետական միջոցների վատնումը՝ առանց որևէ մրցույթ հայտարարելու։

Սև ու սպիտակ Հ/Կ-նե՞ր էլ կան

Ի՞նչու են ընտրվել վերոհիշյալ կազմակերպությունները և ինչու հնարավորություն չի տրվել, որ այլ կազմակերպություններ ևս մասնակից լինելու հայտ ներկայացնեն:

Օրինակ՝ հնարավոր է, ես ևս որպես հասարակական սեկտորի ներկայացուցիչ ցանկանում էի դիտորդական առաքելության իրականացնել Արցախի ՏԻՄ ընտրություններին, այդ ի՞նչ սկզբունքով են ընտրվել հենց ա՛յս երկու կազմակերպությունները։ Չնայած պարզ չէ՞, թե ի՞նչ սկզբունքով. Վարչապետի անմիջական շեֆերը՝ սորոսենք են հանձնարարել։

Ահավասիկ, «Թրանսփարենսի ինթերնեշնլ» հակակոռուպցիոն կենտրոնի ընդհանուր ժողովի անդամների մեջ ուշագրավ շատ անուն-ազգանունների, ՔՊ-ական և ՔՊ-ամերձ  հայտնի դեմքերի ենք հանդիպում: ՀՀ կրթության և գիտության նախարար Արայիկ Հարությունյան, ՀՀ վարչապետի աշխատակազմի ղեկավարի տեղակալ Լիանա Ղալթաղչյան, ԹԻ ՀԿ մարդկային ռեսուրսների և կազմակերպական զարգացման համակարգող, ՀՀ ԱԺ նախագահի տեղակալ՝ Լենա Նազարյան, Սարհատ Պետրոսյան,  ՀՀ անշարժ գույքի կադաստրի կոմիտեի ղեկավար Սարհատ Պետրոսյան , ՀՀ ԱԺ  Առողջապահության և սոցիալական հարցերի մշտական հանձնաժողովի նախագահ Հերիքնազ Տիգրանյան…
Ակամայից հիշում ես հայտնի սովետական ֆիլմը՝ «Օպերացիա Ի» -ն, երբ 15-օրյա կալանքի տակ գտնվողն ինչ աշխատանքի առաջարկ լինում է, առաջ է գալիս ու ձեռք բարձրացնում: Հիմա ՀՀ  վարչապետն է՝ իշխանությունն ինքն է, բայց ընդդիմությունն էլ իրենով է ուզում անել, ի հավելումն, Հ/Կ-ները, այսինքն՝ քաղհասարակությունն էլ իրենք են, դե, մամուլը էն գլխից ինքն է՝ էլ թերթ, էլ կայք, էլ ֆեյսբուք ու ինստագրամ, դիփ ինքն է ու ինքը:

Իսկ մրցույթների հերն էլ անիծած, շատ էլ որ ազատ և թափանցիկ ընտրություն ու մրցույթներ պահանջերով եկան իշխանության:
Граждане алкоголики, тунеядцы, хулиганы... Кто хочет поработать?
- Я.
- Подождите. На сегодня наряды... Песчаный карьер - два человека
- Я.
- Да подождите вы.
- Огласите весь список, пожалуйста.
- Значит так, цементный завод...
- Я.
- Погрузка угля.
- Я.
- Уборка конюшен.
- Я.
- Кроме того...
- Я.
- Да подождите, гражданин. Для вас - персональный наряд, на пятнадцать суток.

Հեղինակ` Մարինե Մինասյան