Փաստ ինֆո

Այսուհետ յուրաքանչյուր տարի 500 զինծառայող սպայական և ենթասպայական կազմից կստանա արտոնյալ պայմաններով հիփոթեքային վարկավորման իրավունք։  Այս մասին կառավարության օգոստոսի 22-ի նիստում ասաց Պաշտպանության նախարար Դավիթ Տոնոյանը՝ ներկայացնելով նախագիծը։

«Նախագծի համաձայն՝ ՝ յուրաքանչյուր տարի ծրագրին կարող է մասնակից դառնալ 500 զինծառայող։ Ծրագիրը նախատեսում է առավելագույնը 28 մլն 500 հազ դրամի չափով հիպոտեկային վարկավորման հնարավորություն, որի սահմաններում գնման պայմանագրում նշված գումարի 10 տոկոսը, որպես կանխավճար ֆինանսավորվում է պետության կողմից։ Առանցքային կառուցապատողից բնակարան ձեռք բերելու դեպքում վարկի տարեկան տոկոսը կազմելու է 7 տոկոս, որի 3 տոկոսային կետը սուբսիդավորվում է պետության կողմից, իսկ մնացած 4 տոկոսը հետ է վերադարձվում վարկառուին՝ իր վճարած եկամտային հարկի հաշվին»,-ասաց Դավիթ Տոնոյանը։

ԿԲ նախագահ Արթուր Ջավադյանն էլ նկատեց, որ, քանի որ  առաջնային շուկայից բնակարան ձեռք բերելու պարագայում գործում է նաև եկամտահարկի վերադարձման կարգը, ուստի լրացուցիչ 3 տոկոսով տոկոսադրույքի սուբսիդավորման պարագայում ստացվում է, որ զինծառայողների համար կգործի անտոկոս վարկավորում։

ՀՀ ոստիկանապետ Վալերիյ Օսիպյանն էլ նկատեց, որ ոստիկանությունը նույնպես այդ ծրագրի անհրաժեշտությունն ունի։ Փոխվարչապետ Մհեր Գրիգորյանն ընդգծեց,  բյուջետային հատկացումների ալգորիթմը ՊՆ-ի դեպքում հստակ է նկարագրված, իսկ մնացած ուժային կառույցների մասով՝ ոչ. «Կարող ենք քննարկել։ Որպեսզի այդ նույն հնարավորությունը տարածենք մնացած ուժայինների վրա, մնում է որոշել բյուջետային հատկացման աղբյուրը»,-ասաց փոխվարչապետ։

Աղբյուր` Փաստինֆո