Փաստ ինֆո

Հայաստանում առաջին անգամ իրականացվեց Ճողվածքների և որովայնի առաջային պատի վիրաբուժությանը նվիրված IHC Armenia 2019 միջազգային կոնֆերանսը, որին մասնակցեցին 150 վիրաբույժներ, կլինիկական օրդինատորներ, ինչպես Հայաստանից, այնպես էլ աշխարհի 20 երկրներից։ Կոնֆերանսը նախաձեռնել էր հայազգի վիրաբույժ Թալար Թեջիրյանը, իսկ կազմակերպչական պատասխանատուն «Հայկական տեղեկատվական կենտրոնն» էր (AIC):

Կազմակերպիչները փաստում են՝ բժիշկների հետ աշխատանքը չափազանց պատասխանատու ու պարտավորեցնող է։ «Մասնակիցները տարիների փորձառություն ունեցող մասնագետներ են, ովքեր ոչ միայն մասնագիտական առումով են առաջատար, այլև մասնակցել են բազմաթիվ միջազգային կոնֆերանսների և պետք էր անել առավելագույնը, որպեսզի ամեն ինչ ճիշտ ժամանակին լիներ, շատ հաշվարկված ու մտածված։ Օրը հագեցած էր, կոնֆերանսի թեման բավական ծանր էր, հետևաբար նախատեսել էինք մի քանի ընդմիջումներ, իսկ ավարտին՝ մասնակցության վկայականների հանձնումից հետո՝ ճաշկերույթ, պետք էր լիցքաթափվել»,- մեզ հետ զրույցում նշեց «Հայկական տեղեկատվական կենտրոնի» տնօրեն Հայկ Մարկոսյանը։

Կոնֆերանսի բանախոսները աշխարհահռչակ մասնագետներ էին։ Իրենց փորձն ու գիտելիքները հայ վիրաբույժներին ներկայացրին Բելգիայից Եվրոպական ճողվածքաբանական միության նախագահ Ֆիլիպ Մայսոմսը, ԱՄՆ-ից Թալար Թեջիրյանը, Շիրին Թոֆիգն ու Մերսեդեհ Բաղայը, Ռուսաստանից Վլադ Բուրդակովը, Հայաստանից Լևոն Գրիգորյանը:

IHC Armenia 2019 կոնֆերանսի մասնակիցները ստացան ինչպես մասնակցության, այնպես էլ կրեդիտավորման վկայականներ, ծանոթացան իրենց ոլորտի առաջատար մասնագետների հետ և հնարավորություն ունեցան անդամակցել IHC ֆեսյբուքյան փակ խմբին։

«IHC –ն ֆեյսբուքյան փակ խումբ է, որտեղ ավելի քան 8000 վիրաբույժներ, ճողվածքաբաններ քննարկում են ոլորտի նորությունները, անհատական բարդ դեպքերը, կիսվում իրենց փորձով ու գիտելիքներով։ Այս կոնֆերանսը հնարավորություն էր տալիս մասնակիցներին անդամակցել փակ խմբին ու դառնալ այդ մեծ ընտանիքի անդամ։ Կարծում են բացի այս մեկօրյա գիտելիքից, վիրաբույժների համար սա ևս մեծ հնարավորություն է հետագայում մշտապես թարմացնել իմացություններն ու շփվել աշխարհի տարբեր անկյուններում գտնվող իրենց կոլեգաների հետ»,- խոսելով «IHC Armenia 2019» կոնֆերանսի առավելությունների մասին ընդգծեց բանախոս Ֆիլիպ Մայսոմսը, հավելելով․ «Կազմակերպչական առումով մասնագետները բավական նրբանկատ էին աշխատել։

Թեման այնքան ծանր էր, որ դժվար էր մեկ օրում այդքան տեղեկատվություն կլանել, բայց ամեն ինչ այնքան ճիշտ էր հաշվարկված, որ ժամանակն աննկատ անցավ։ Մենք նաև հնարավարություն ունեցանք շրջել Հայաստանի տեսարժան վայրերով, ծանոթանալ մշակութային արժեքներին ու իհարկե, ճաշակել հայկական ուտեստները։ Ինձ համար չափազանց կարևոր այցելություն էր»։

Աղբյուր` Փաստինֆո