Փաստ ինֆո

Ռոբերտ Քոչարյանն ընդդեմ Նիկոլ Փաշինյանի գործով Քոչարյանից որպես դատական ծախսի գումար հօգուտ Փաշինյանի 200 հազար դրամ բռնագանձելու վերաբերյալ որոշումը բողոքարկվել է Վերաքննիչ դատարան: Այս մասին «Փաստինֆո»-ի հետ զրույցում ասաց Քոչարյանի ներկայացուցիչ Հայկ Ալումյանը։

Նրա խոսքով՝ եղել է ընդամենը երկու դատական նիստ, եւ դրանցից յուրաքանչյուրն էլ եղել է 20-30 րոպե. «Եթե համեմատենք այս բնույթի նմանատիպ այլ գործերի հետ, դատական ծախսերը, մասնավորապես փաստաբանի վճարը, սովորաբար գանձվում է 100 հազարի չափով։ Դա էլ այն դեպքում, երբ մի շարք նիստեր են լինում, եւ գործն ըստ էության լուծող դատական ակտեր են կայացվում»։

Հայկ Ալումյանը նշեց, որ Վերաքննիչ բողոքում շեշտել են այն հանգամանքը, որ նույն դատավորը նույն տեսակի գործերով 100 հազար դրամ է բռնագանձել. «Դա էլ այն դեպքում, երբ  հայցվորը հայցից չի հրաժարվել, եւ բազմաթիվ դատական նիստեր են եղել։ Այսինքն՝ մենք չենք հասկանում, թե որն է պատճառը, որ տվյալ դեպքում դատարանը շեղվել է գոյություն ունեցող դատական պրակտիկայից։ Միայն մի պատճառ կարող է լինել. դա այն է, որ մյուս կողմում գործող վարչապետն է»։

Հիշեցնենք, որ Ռոբերտ Քոչարյանի ներկայացուցիչ Հայկ Ալումյանը 2018 թվականի սեպտեմբերի 17-ին քաղաքացիական հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու եւ հրապարակայնորեն ներողություն խնդրելուն պարտավորեցնելու պահանջով։

Առաջին դատական նիստին՝ հունիսի 12-ին, Հայկ Ալումյանը դատարանում ասել էր, որ եթե Նիկոլ Փաշինյանի ներկայացուցիչ Գեւորգ Գյոզալյանը հայտարարի, որ Փաշինյանը նկատի չի ունեցել Քոչարյանին, իրենք պատրաստ են հրաժարվել հայցից: Հաջորդ օրը՝ լրագրողների հետ զրույցում, նա նշել էր, որ հայցվոր կողմը հայցից հրաժարվելու է, քանի որ Փաշինյանի ներկայացուցիչ Գյոզալյանը հայտարարել է, որ վարչապետը նկատի է ունեցել Սահմանադրական նորմը և ոչ թե կոնկրետ անձի:

Հունիսի 24-ին Քոչարյանն ընդդեմ Փաշինյանի գործը կարճվել էր, եւ դատարանը պարտավորեցրել էր հայցվոր կողմից որպես դատական ծախս բռնագանձել 200 հազար ՀՀ դրամ: Նշենք, որ պատասխանող կողմը պահանջել էր 650 հազար դրամ:

Հեղինակ` Միլենա Խաչիկյան