Փաստ ինֆո

«Ամուլսարի հարցով նոր փորձաքննություն անցկացնելու որոշումը ոչ թե բնապահպանական կամ տնտեսական, այլ քաղաքական խնդիր լուծեց: Դա քաղաքական որոշում էր եւ պայմանավորված էր Նիկոլ Փաշինյանի՝ ԱՄՆ սպասվող այցելությամբ»,- «Փաստինֆո»-ի հետ զրույցում նման կարծիք է հայտնել քաղտեխնոլոգ Արմեն Բադալյանը՝ անդրադառնալով Ամուլսարի շուրջ զարգացումներին:

Հիշեցնենք, նախօրեին վարչապետ Նիկոլ Փաշինյանը Ֆեյսբուքի ուղիղ եթերով 1,5 ժամ խոսեց Ամուլսարի խնդրի մասին՝ փորձելով քաղաքացիներին համոզել, որ հանքի շահագործումն անվտանգ է եւ բխում է Հայաստանի շահերից:

«Իշխանություններին պետք էր, որպեսզի լիներ դրական կարծիք, եղավ դրական կարծիք, եթե պետք լիներ, որ այդ կարծիքը լիներ բացասական, այն կլիներ բացասական: Սա քաղաքկաան հարց է»,-ասաց Արմեն Բադալյանը: Նրա խոսքով, ԱՄՆ-ում Փաշինյանը որեւէ օրակարգ՝ ոչ քաղաքական, ոչ ռազմական եւ ոչ էլ անգամ տնտեսական, չունի, միակ օրակարգը մնում է Ամուլսարի հարցը, որը վարչապետը ցանկանում է որպես նվեր մատուցել ԱՄՆ-ի իշխանություններին՝ հույս ունենալով այդկերպ ինչ-որ դրական վերաբերմունքի արժանանալ եւ ստանալ ներդրումներ:

Չնայած այն հանգամանքին, որ ԱԺ իշխող «Իմ քայլը» խմբակցության մի շարք պատգամավորներ, այդ թվում ԱԺ փոխնախագահ Լենա Նազարյանը, Ֆեյսբուքյան գրառմամբ նշել էին, որ լիբանանյան Էլարդ ընկերության զեկույցն իրենց մտահոգությունները չի փարատել, քաղտեխնոլոգը չի կարծում, որ Ամուլսարն այն հարցն է, որը լուրջ պառակտում կարող է մտցնել իշխանության ներսում եւ կարող է կատալիզատորի դեր կկատարել ու ցնցել իշխանական համակարգը:
«Այն, որ 88 հոգանոց խմբակցությունը միատարր չէ, դա միանշանակ է, այնտեղ լավագույն դեպքում 20 պատգամավոր կգտնեք, ովքեր, այսպես ասած, հավատարիմ նիկոլական են, եւս 20-ը այսես ասած, սորոսական են, մյուսները միասին վերցրած այն ճահիճն են, որն այս կամ այն պահին դիրքավորվում է: Ամուլսարի հարցը այն հարցը չէ, որի պատճառով իշխանական համակարգում կարող են ճաքեր լինել: Այդ համակարգի ճաքն այլ հարցերիի շուրջ կլինի եւ կլինի այն ժամանակ, երբ իշխող խմբակցությունը տեսնի, որ Փաշինյանի իշխանությունն արդեն իր ձեռքից գնում է: Դրա տեսանելի սաղմերը կան»:

Ըստ քաղտեխնոլոգի, այնպես, ինչպես Երեւանի ավագանու անդամները, նախկին ակտիվիստ ԱԺ պատգամավորների մեծ մասն էլ շատ հեշտությամբ հրաժարվում է իր նախկին դիրքորոշումներից. «Նրանք բնապահպան էին այնքանով, որքանով գումարներ էին ստանում եւ պատվեր կար՝ լինել բնապահպան, հիմա իրենք վճարը այլ տեղից են ստանում՝ որպես ԱԺ պատգամավոր կամ իշխանական հիեարխիայի մաս, նրանք ամբողջովին մոռանում են բնապահպանական խնդիրները»:

Ըստ Բադալյանի վարչապետի հետ Ամուլսարի հարցում անհամաձայնությունը նաեւ դեմոկրատիայի ու բազմակարծության իմիտացիա է: «Մի մասը գուցե իրականում դեմ է հանքի շահագործմանը, բայց դրանով նաեւ ժողովրդավարության դիզայնն է ապահովվում, այդ պատգամավորները ընդամենը բնապահպաններին դուր գալու քաղաքականություն են որդեգրել՝ շատ լավ հասկանալով, որ իրենց՝ «դեմ» լինելը վնաս չէ վարչապետին: Նրանք շատ լավ հասկանում են, որ իրենց ձայնը որոշիչ չէ»:

Քաղտեխնոլոգը նույն ժողովրդավարական դիզայնն է համարում նաեւ այն, որ ժամանակին, երբ իշխանությանը պետք էր, ԱԺ դարպասները բացվեցին, իսկ այժմ, երբ վտանգ կար, փակվեցին. «Համակարգի էությունը չի փոխվել, եթե նախկինում ոստիկանությունը ծառայում էր քրեաօլիգարխիկ համակարգին, հիմա ծառայում է Փաշինյանի անձնիշխանական համակարգին: Նախկին համակարգի մեջ եղած բոլոր բացասական երեւույթները տեղափոխվել են այստեղ, նախկինում էլ կհիշեք, տարբեր հարցերի վերաբերյալ այս կամ այն, ՀՀԿ-ական գործիչը այլ կարծիք էր հայտնում, հիմա էլ նույնն է եւ այն ժամանակ էլ նույն ժողովրդավարական դիզայնն էր օգտագործվում: Հիմա էլ, երբ հարկավոր է այդ դիզայնը ցույց տալ, ԱԺ դարպասները բացում են, երբ վտանգ է սպառնում՝ փակում են, նույնը եւ ոստիկանության կողմից ուժի կիրառմանն է վերբերում»:

Աղբյուր` Փաստինֆո