Փաստ ինֆո

«Փաստինֆո»-ի հաղորդմամբ` Երեւանի ընդհանուր իրավասության դատարանում Մանվել Գրիգորյանի գործով ընթացող դատական նիստին քիչ առաջ ժամանեց Դատապարտյալների հիվանդոց ՔԿՀ-ից բժիշկ-սրտաբան, Միջգերատեսչական փորձաքննության հանձնաժողովի անդամ Հարություն Հեքիմյանը։

Մանվել Գրիգորյանի պաշտպաններից Արսեն Մկրտչյանը բացարկի միջնորդություն հայտնեց Հեքիմյանին՝ պատճառաբանելով, որ ինքը եւ Հեքիմյանը նախկին կոլեգաներ են եւ ունեն մտերմիկ, նույնիսկ ընտանեկան մոտ հարաբերություններ։ Արսեն Մկրտչյանը ընդգծեց նաեւ, որ ինքը հաղորդում է ներկայացրել Հեքիմյանի անմիջական ղեկավարի վերաբերյալ․ «Դրանից բացի, նախորդ փորձաքննության մեր ամենամեծ դժգոհությունները կապված էին Ձեր աշխատանքի հետ»,-ասաց պաշտպանը՝ հավելելով, որ նշված հանգամանքները կարող էին նույնիսկ ինքնաբացարկի հիմք հանդիսանալ։

Հարւթյուն Հեքիմյանը, ի պատասխան պաշտպանին, ասաց․ «Ես լավ չհասկացա, թե ինչը պետք է հիմք հանդիսանա ինքնաբացարկի համար, մենք եղել ենք կոլեգաներ, այո, աշխատել ենք նույն հիմնարկում, բայց մտերիմ հարաբերություններ, առավել եւս ընտանեկան հարաբերություններ չենք ունեցել»։

Արսեն Մկրտչյանն էլ ասաց, որ հնարավոր է՝ նա մոռացած լինի այն խնջույքները, որոնց իրենք ընտանիքներով մասնակցել են։

Մեղադրող դատախազ Հայկ Պետրոսյանն ընդգծեց, որ երբ քիչ առաջ ինքը փաստարկեց, որ 20 տարի բուժումը, ընտանիքի հետ շփումը կասկած է հարուցում անձի անկողմնակալության հնարավոր ռիսկի մասին, դատարանը այդ հիմքը բավարար չհամարեց․ «Այն պարագայում, երբ պաշտպանը, չակերտավոր քողարկված մտերմությունը փորձում է հրամցնել, հատկապես, երբ պրն Հեքիմյանը դա հերքեց, մեր կարծիքով՝ միջնորդությունը անհիմն է»։

Խորհրդակցական սենյակից վերադառնալով՝ դատավոր Մնացական Մարտիրոսյանը մերժեց պաշտպանի միջնորդությունը անհիմն լինելու պատճառաբանությամբ։

Հեղինակ` Միլենա Խաչիկյան