Փաստ ինֆո

Երեւանի ընդհանուր իրավասության դատարանում դատավոր Մնացական Մարտիրոսյանի նախագահությամբ շարունակվում է  Մանվել Գրիգորյանի եւ նրա կնոջ՝ Նազիկ Ամիրյանի գործով դատական նիստը։

«Փաստինֆո»-ի հաղորդմամբ՝ Մանվել Գրիգորյանը նիստին ներկա չէ։ Ներկա են պաշտպաններ Լևոն Բաղդասարյանը, Կարեն Քամալյանը, Արսեն Մկրտչյանը, գործով ամբաստանյալ Նազիկ Ամիրյանը, ինչպես նաև` դատախազ Հայկ Պետրոսյանը։

Նշենք, որ Ֆրանսիայից դատարան է ժամանել հայազգի փորձագետ, ուռուցքաբան Նորբերտ Ավետյանը։ Նրա հետ է թարգմանիչ Նարինե Մուրադյանը։

Ավետյանը հայտնեց, որ ինքը Մանվել Գրիգորյանին բուժում է արդեն ութ տարի․ «Նա ստացել է ճառագայթում, քիմիաթերապիա, նաեւ վիրահատվել է։ Նա ամեն տարի իմ կողմից զննվել է, բացի վերջին երկու տարիներից»,-ասաց Նորբերտ Ավետյանը։ Ի պատասխան դատախազի հարցին, թե ինքը բուժման համար Մանվել Գրիգորյանից գումար վերցրե՞լ է, ուռուցքաբանն ասաց, որ գումարը վճարվել է հիվանդանոցին։ Ի պատասխան դատախազի մյուս հարցին, թե ի՞նչ հարաբերություններ ունի ինքը Մանվել Գրիգորյանի հետ, Ավետյանն ասաց, որ ունեն մտերիմ հարաբերութուններ, քանի որ ինքը 20 տարի  շարունակ բուժել է նրա դստերը։

Դատախազը ժամանակ խնդրեց՝ փորձագետի բացարկի հիմքերը պատրաստելու համար։ Այդպիսով դատական նիստը հետաձգվեց։

Հավելենք, որ դատավոր Մնացական Մարտիրոսյանը հայտնեց նաեւ, որ «Նաիրի» բ/կ-ից ստացվել է տեղեկանք այն մասին, որ Մանվել Գրիգորյանն ի վիճակի չի եղել մասնակցել այսօրվա նիստին։ Դատարան է ստացվել նաեւ Լեւոն Հակոբյանի դիմումն այն մասին, որ նա այլեւս փորձագիտական հանձնաժողովի անդամ չէ, քանի որ Առողջասպսհության նախարարի համապատասխան հրամանով նրա փոխարեն նշանակվել է Գագիկ Հարությունյանը։

Հիշեցնենք, որ նախորդ դատական նիստին դատարանը բավարարել էր Պետեկամուտների կոմիտեի ներկայացրած միջնորդությունը՝ որոշելով Մանվել Գրիգորյանին պատկանող գույքի մի մասն ազատել կալանքից։ Միաժամանակ դատավոր Մնացական Մարտիրոսյանը մերժել էր պաշտպանի՝ գրավի դիմաց Մանվել Գրիգորյանին ազատ արձակելու միջնորդությունը։

Ավելի վաղ հայտնել ենք, որ Մանվել Գրիգորյանը մեղադրվում է ապօրինի կերպով զենք-զինամթերք պահելու, 101.232.917 ՀՀ դրամի գույք յուրացնելու, 1.228.176.342 ՀՀ դրամի հարկերի վճարումից խուսափելու, պետական միջոցներից 1.225.003.300 ՀՀ դրամ վատնելու և շորթմամբ 37․101․100 ՀՀ դրամ արժողությամբ գույքի հափշտակությունը կազմակերպելու մեջ: Գրիգորյանի կնոջը՝ Նազիկ Ամիրյանին, մեղադրանք է առաջադրվել այն բանի համար, որ նա, «Զենքի մասին» ՀՀ օրենքով նախատեսված սահմանափակումների շրջանցմամբ, ամուսնու՝ Մանվել Գրիգորյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք է բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր, ինչպես նաև կատարել է տարբեր տեսակի հափշտակություններ։

Հեղինակ` Միլենա Խաչիկյան