Փաստ ինֆո

Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քննվող քրեական գործի շրջանակում էնդոկրինոլոգ բուժքույրի ցուցմունքի հիման վրա քրեական գործի հարուցումը մերժվել է։ Այս մասին «Փաստինֆո»-ի հարցմանն ի պատասխան՝ տեղեկացրեց ՀՔԾ մամուլի խոսնակ Մարինա Օհանջանյանը։

Ավելի վաղ հայտնել ենք, որ այս քրեական գործի նյութերից երկու դրվագ ուղարկվել է նախաքննական մարմիններ։ Մասնավորապես, Հատուկ քննչական ծառայություն էր ուղարկվել պոլիկլինիկայի բուժքույր, գործով ամբաստանյալ Մարինե Բաղդասարյանի ցուցմունքի այն դրվագը, ըստ որի՝ քննիչը իրեն ստիպել և սպառնացել է վարույթն իրականացնող մարմնին տրամադրել կեղծ տեղեկատվություն Արմեն Մոսիկյանի գործողությունների վերաբերյալ, որը ինքը հրաժարվել է տրամադրել:

Մարինա Օհանջանյանը հայտնեց, որ քրգործի հարուցման համար բավարար հիմքեր չեն եղել։

Ինչ վերաբերում է Քննչական կոմիտե ուղարկված նյութերին,  դրանք վերաբերում են պոլիկլինիկայի նախկին տնօրեն, ամբաստանյալ Արմեն Մոսիկյանի ցուցմունքի այն դրվագին, որով նա հայտնել էր, որ Բյուրեղավան համայնքի ղեկավարը իրենից որպես կաշառք ամսական 250.000 ՀՀ դրամ գումար է պահանջել։ Քննչական կոմիտեից մեզ արդեն հայտնել են, որ այդ նյութերի հիման վրա հարուցվել է քրեական գործ ՀՀ ՔՕ-ի 311-րդ հոդվածի 1-ին մասով, այն է՝ պաշտոնատար անձի կողմից կաշառք ստանալը։

«Փաստինֆո»-ն արդեն հայտնել է, որ Կոտայքի մարզի ընդհանուր իրավասության դատարանում Բյուրեղավան համայնքի քաղաքային պոլիկլինիկայի նախկին տնօրենի եւ էնդոկրինոլոգ բուժքույրի վերաբերյալ քննվող քրեական գործի շրջանակում ի հայտ են եկել նոր հանգամանքներ. մեղադրյալները դատարանի դահլիճում հայտարարել են, որ ի սկզբանե իրենց առաջադրված մեղադրանքը հիմնված է եղել համայնքային ենթակայությամբ գտնվող պոլիկլինիկայի 4 բուժքույրերի ցուցմունքների վրա, որոնք, նրանց խոսքով, ուղղորդված են եղել Բյուրեղավանի քաղաքապետ Հակոբ Բալասյանի կողմից. «Վերջին երկու դատական նիստերին իմ պաշտպանյալները ցուցմունք տվեցին եւ մեկնաբանեցին, թե ինչով է պայմանավորված իրենց այդ դիրքորոշումը։ Մասնավորապես, Արմեն Մոսիկյանը նշեց, որ 2009 թվականին պոլիկլինիկայի տնօրեն նշանակվելուց հետո առանձնազրույց է ունեցել քաղաքապետի հետ, որի ժամանակ քաղաքապետը նշել է, որ ամեն ամիս իրեն պետք է վճարի 250 հազար դրամ կաշառք, ինչից նա հրաժարվել է։ Դրանից բացի, քաղաքապետը 500 դոլար էլ պահանջել է էնդոկրինոլոգ բժշկուհուց»,- մեզ հետ զրույցում նշել էր մեղադրյալների պաշտպան Վահան Հովհաննիսյանը։

Հիշեցնենք, որ ըստ նախաքննական մարմնի՝ բուժքույր Մարինե Բաղդասարյանին մեղադրանք է առաջադրվել պոլիկլինիկայի նախկին տնօրեն Արմեն Մոսիկյանի հետ նախնական համաձայնությամբ յուրացման եղանակով հափշտակության կատարելու համար։ Պոլիկլինիկայի տնօրենին մեղադրանք է առաջադրվել նաեւ պաշտոնեական լիազորությունները չարաշահելու համար։ Քրեական գործը դատարանում է արդեն երկու տարի։

Հեղինակ` Միլենա Խաչիկյան