Փաստ ինֆո

«Քննարկումների արդյունքում եկա այն եզրակության, որ իրականում Ամուլսարի հանքը, այս պայմաններով շահագործման դեպքում, շահագործվելու է շատ բարձր, Հայաստանի համար աննախադեպ բնապահպանական ստանդարտներով»,-այսօր իր ֆեյսբուքյան ուղիղ եթերում ասել է ՀՀ վարչապետ Նիկոլ Փաշինյանը։

Նա նշել է, որ Հայաստանում գործող մյուս հանքերի ստանդարտները նույնպես պետք է բարձրացվեն և դրա համար տվյալ ընկերությունները պետք է տասնյակ միլիոնավոր դոլարներ ծախսեն, ու նման ներդրումներից խուսափելու համար գումարներ են ծախսվում «PR» իրականացնելու նպատակով։

«Սիրելի՛ հայրենակիցներ, կոչ եմ անում, որ կառավարությանը հնարավորություն տաք, որպեսզի զբաղվի այս հարցով»,- ասել է ՀՀ վարչապետ Նիկոլ Փաշինյանն ու ավելացրել. «Անկեղծ եմ ասում, չեմ հասկանում քաղաքացիական անհնազանդության այն գործողությունը, որ շարունակվում է Ամուլսարում։ Այդ գործողությունների նպատակը կարող է երկակի մտորումների տեղիք տալ։ Մենք պետք է բոլոր խնդիրներին լուծում տանք փաստերի հիման վրա, չենք կարող կայացնել չինֆորմացված որոշումներ, որի ճշմարտացիության մեջ մենք ինքներս համոզված չենք», - ասաց Փաշինյանը։

Նա ընդգծեց՝ կառավարության բոլոր գործողությունները հիմնված պիտի լինեն փաստերի վրա՝ կոչ անելով հնարավորություն ընձեռել կառավարությանն առանց նախապայմանների ծանոթանալ իրավիճակին․

«Խնդրում եմ մի՛ ասեք մեզ, որ միայն այսպիսի փաստերի պիտի հանգենք, որովհետև ուրիշ տարբերակ չկա։ Մենք գնալու ենք օբյեկտիվ փաստերը գտնենք և մեր հնարավոր որոշումը հիմնվելու է փաստերի վրա՝ անկախ նրանից, թե ինչ փաստ ի հայտ կգա»։

Նա ֆեյսբուքյան ուղիղ եթերում տեղեկացրել է, որ ինքը մեկ առ մեկ ընթերցել է Ամուլսարի հետ կապված իրեն ուղղված բոլոր նամակներն ու ահազանգերը։
«Այդ նյութերը կարդալու ընթացքում գիշերները չէի կարողանում քնեի, որովհետև պնդումներ կային, որ Սևանը կորցնում ենք, Ջերմուկի ջուրը բնապահպանական առումով կորցնում ենք»,- պատմել է ՀՀ վարչապետը։

Փաշինյանը նշել է, որ նամակները կարդալուց հետո իր մոտ հարց է առաջացել, թե ինչպես կարող է որոշում կայացնել, որպեսզի այն հիմնված չլինի զգացմունքների վրա։

Լուծումը դարձել է քրեական գործի հարուցումը։ Ըստ Փաշինյանի՝ այն հարուցվել է իր կողմից ուղարկված դիմումի հիման վրա, որի շրջանակներում ահռելի ծախսեր են կատարվել՝ միջազգային փորձաքննությունն ապահովելու համար։

Ըստ նրա՝ հայտարարվել է մրցույց, որի արդյունքում փորձաքննությունը վստահվել է «Էլարդ» ընկերությանը, իսկ փորձաքննությունը կառավարության վրա արժեցել է 400 հազար դոլար։

Անդրադառնալով փորձաքննության եզրակացությանը՝ Փաշինյանը նշեց, որ ըստ դրանց Ամուլսարի հանքի շահագործումը վտանգ չի պարունակում Սևանա լճի և Ջերմուկի ջրերի հանար։ Փաշինյանն ընդգծեց, եթե անգամ երկրաշարժի հետևանքով լցակույտերի ջրերը Սևանա լճում հայտնվեն, ապա մեծ վնաս չեն պատճառի։

«Եթե այդպիսի սցենար տեղի ունենա, այդ ազդեցությունը Սևանա լճի համար այնքան փոքր կլինի, որ սա հնարավոր չի լինի չափել, այսինքն, կներեք գրոտեսկ օրինակ բերեմ, եթե մեկը, ենթադրենք, Սևանի ափին իր մեքենան լվանում է, դա անշուշտ բնապահպանական վնաս է հասցնում Սևանա լճին, բայց այն այնքան փոքր է, որ մենք լաբորատորիայով սկսենք հետազոտել, չենք կարող գտնել այդ մեքենայի լվացման հետևանքով Սևանին հասցված վնասը, որովհետև դա այնքան փոքր կլինի, որ կլինի անչափելի։ Մի օրինակ էլ բերեմ՝ հիմա Սևանի ափամերձ բնակավայրերի և Սևանի ափին մարդու գործունեության հետևանքով Սևանին տասնյակ, եթե ոչ 100-ավոր անգամներ ավելի մեծ վնաս է պատճառվում, քան կարա Ամուլսարի գործունեության հետ կապված ֆորսմաժորի դեպքում տեղի ունենա», - ասաց Փաշինյանը։

Փաշինյանը կարևորեց, որ «Լիդիանն» «Էլարդի» առաջադրած 16 մեղմման միջոցներից 10-ը իր ՇՄԱԳ-ում ներառել է, ևս 5-ը՝ կնախատեսի ըստ անհրաժետության։

«Այս պայմաններում հանքը շահագործվելու դեպքում շահագործվելու է շատ բարձր բնապահպանական ստանդատներում։ Մենք բերում ենք Հայաստանի համար համար աննախադեպ բարձր բնապահպանական ստանդարտի», - ասաց նա։

Աղբյուր` Փաստինֆո