Փաստ ինֆո

«Երեւանի քաղաքի դատարանը գրություն է ուղարկել Վճռաբեկ դատարան՝ Քոչարյանի եւ մյուսների գործը կամ դրա հավելվածը Երեւանի ընդհանուր իրավասության դատարան ուղարկելու նպատակով, եւ դա արվել է այն պարզ պատճառով, որ բոլորի մտահոգությունները վերանան»,-«Փաստինֆո»-ի հաղորդմամբ՝ այսօր այս մասին հայտարարեց Դատական դեպարտամենտի ղեկավար Կարեն Փոլադյանը. «Գրությունն անհետեւանք մնալ չի կարող։ Եթե ոչ այսօր, ապա երկուշաբթի կամ երեքշաբթի գործը կուղարկվի Առաջին ատյանի դատարան, եւ համապատասխան ընթացակարգերը կիրականացվեն։ Այսինքն՝ 1-2 օրվա ընթացքում գործը կամ դրա հավելվածը կուղարկվեն Երեւանի դատարան՝ մակագրման նպատակով։ »,-ասաց նա։

Խոսելով մինչ այս Քոչարյանի եւ մյուսների գործը այլ դատավորի չվերամակագրելու հանգամանքից՝ Դատական դեպարտամենտի ղեկավարն ասաց, որ գործն այս պահին Երեւանի ընդհանուր իրավասության դատարանում չէ, այդ պատճառով էլ չի վերամակագրվել. «Ճիշտ է, դատավոր Դավիթ Գրիգորյանի լիազորությունները կասեցվել են, եւ նրա վարույթում գտնվող գործերից, եթե չեմ սխալվում, 43-ից 37-ը վերամակագրվել են,  բայց այդ գործը չի վերամակագրվել, որովհետեւ այն գտնվում է Վճռաբեկ դատարանում»։

Կարեն Փոլադյանը հիշեցրեց՝ Վերաքննիչ քրեական դատարանում քննվել է Առաջին ատյանի որոշման դեմ բերված բողոք, կայացվել է դատական ակտ, ինչի դեմ էլ բերվել է Վճռաբեկ բողոք, եւ դրանով պայմանավորված էլ, ըստ նրա, գործն այս պահին գտնվում է Վճռաբեկ դատարանում. «Իմ անձնական կարծիքով՝ մինչեւ Վճռաբեկ դատարանի կողմից վերջնական դատական ակտ չկայացվի, Առաջին ատյանի դատարանում այն չի կարող քննվել»։

Ի պատասխան լրագրողի այն դիտարկմանը, թե Քոչարյանի պաշտպանները նրանց մեղադրում են գործի ձգձգման մեջ, Կարեն Փոլադյանն ասաց. «Դրա հասցեատերը ես չեմ, շատ մարդիկ են դատական համակարգին մեղադրում, բայց դա արվում է՝ որոշակի շահերից ելնելով։ Ես գործի ձգձգում չեմ տեսնում։ Ռոբերտ Քոչարյանին կալանքի տակ պահելու նպատակ դատական համակարգում չկա»։

Ի պատասխան «Փաստինֆո»-ի այն դիտարկմանը, թե դեպարտամենտի հայտարարությունից ստացվում է, որ Վճռաբեկ դատարանում գործն ըստ էության չլուծող դատական ակտի քննարկումը կասեցնում է բուն գործի ընթացքը Ընդհանուր իրավասության դատարանում, Կարեն Փոլադյանն ասաց. «Բողոքարկվել է կասեցման վերաբերյալ դատարանի որոշումը։ Եթե Վճռաբեկ դատարանը դրա վերաբերյալ դիրքորոշում դեռ չի արտահատել, Առաջին ատյանը ինչպե՞ս սկսի գործի քննությունը»։

Կարեն Փոլադյանի կարծիքով՝ Վերաքննիչ քրեական դատարանի՝ գործի կասեցումը բեկանելու որոշումը դեռեւս չի մտել օրինական ուժի մեջ. «Այդ ակտի դեմ բերվել է վճռաբեկ բողոք, եւ քանի դեռ Վճռաբեկ դատարանը իր խոսքը չի ասել, Վերաքննիչի այդ որոշումը օրինական ուժի մեջ չի մտել»։

Մանրամասները՝ «Փաստինֆո»-ի տեսանյութում

Հեղինակ` Միլենա Խաչիկյան