Փաստ ինֆո

Ամուլսարի շահագործման հետ կապված միջազգային եզրակացությունը թույլ է տալիս հանգելու երեք կարևոր կետի։ Այս մասին կառավարության օգոստոսի 15-ի նիստում ասաց Քննչական կոմիտեի նախագահ Հայկ Գրիգորյանը։

«Ամուլսարի ստորգետնյա ջրերի և Ջերմուկի տերմալ աղբյուրների միջև որևէ կապ չկա։ Կապ չկա նաև Ամուլսարի ստորգետնյա ջրերի և Սևանա լճի ավազանի հետ, սակայն երկրաշարժի պարագայում հնարավոր է թթվային դրենաժի ինչ-որ կոնցետրացիայի ներթափանցում Սևանա լճի ավազան, բայց այդ կոնցենտրացիայի համակցությունը Սևանա լճի ավազանի ծավալներում աննշան կլինեն։ Ամենակարևորը Ամուլսարի ստորգետնյա ջրերի ազդեցությունն է Դարբ, Որոտան և Արփա գետերի վրա, որը հնարավոր է որ լինի, սակայն, եթե «Լիդիան» ՓԲԸ-ն ձեռնարկի փորձագիտական խմբի կողմից առաջարկվող 16 մեղմման միջոցները, ապա ռիսկերը կառավարելի կլինեն», - ասաց ՔԿ նախագահը։

Վերջինս հավելեց, որ Լիդիան-Արմենիա ՓԲԸ-ն երեկ ծանոթացել է այդ եզրակացության հետ և ընկերության փորձագետները պատրաստ են առաջարկվող 16 մեղմման միջոցներից 15-ը կիրառել. «Դրանցից տասն արդեն կիրառվում են, հինգն էլ պատրաստ են ապագայում կիրառել։ Մեկ մեղմման միջոցն էլ դեռ քննարկման փուլում է»,-ընդգծեց ՔԿ նախագահը։

Նա նաև անդրադարձավ քրեական գործի հետագա ընթացքին՝ նկատելով, որ ստացված եզրակացության վերլուծությունը թույլ է տալիս այդ փուլում ենթադրել, որ ՔՕ 282-րդ հոդվածով քննվող քրեական գործով որևէ մեկին քրեական հետապնդման ենթարկելու հիմք չկա։

Վարչապետ Նիկոլ Փաշինյանը հարցրեց՝ արդյոք դա նշանակում է, որ գործը կկարճվի, որին ի պատասխան ՔԿ նախագահն ասաց, որ գործի քննության այս ուղղվածությունը դա է, որ քրեական գործը կկարճվի։

Հեղինակ` Հասմիկ Կոշկարյան