Փաստ ինֆո

«Իրավական պետության գաղափարից այս աստիճան հեռանալը անդրադառնալու է ոչ միայն Քոչարյանի, այլեւ մեզանից յուրաքանչյուրի ճակատագրի վրա, եթե մենք հայտնվենք դատական համակարգի տիրույթում»,- «Փաստինֆո»-ի հաղորդմամբ՝ այս մասին այսօր հրավիրված ասուլիսում հայտարարեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը՝ ամփոփելով նախորդ ասուլիսից հետո տեղի ունեցած որոշ իրադարձություններ։

Պաշտպանը հիշեցրեց, որ հունիսի 27-ին միջնորդություն են ներկայացրել Ռոբերտ Քոչարյանին գրավի դիմաց ազատ արձակելու վերաբերյալ, որը մինչ օրս չի քննվել.«Օրենքում նշված է, որ նման միջնորդությունները քննվում են այն ստանալուց անմիջապես հետո։ Այսօր օգոստոսի 14-ն է, սակայն խախտելով ներպետական օրենքի հստակ պահանջը՝ դատարանը մեր միջնորդությունը դեռեւս չի քննել։ Մենք այդ կապակցությամբ դիմել ենք Եվրոպական դատարան։ Սա թվով 7-րդ գանգատն է, եւ գանգատի առարկան է արդարադատություն իրականացնելուց հրաժարվելը»։

Ալումյանի խոսքով՝ Առաջին ատյանի դատարանը միջնորդութունը քննության չառնելը պատճառանում է՝ ասելով, որ Դավիթ Գրիգորյանը այլեւս չի կարող քննել այդ միջնորդությունը, որովհետեւ նրա գործունեությունը կասեցված է, իսկ ուրիշ դատավորի գործը դեռ մակագրված չէ. «Սա օրենքի եւ Եվրոպական կոնվենցիայի 5-րդ հոդվածի 3-րդ  կետից չբխող պատճառաբանություն է»,- կարծում է պաշտպանը։

Վերջինս անդրադարձավ նաեւ ՍԴ-ի շուրջ սկսված նոր զարգացումներին. «Այս ընթացքում, ինչպես գիտեք, ՍԴ-ի շուրջ նոր զարգացումներ են սկսվել։ Մինչեւ այդ ուզում էին բիրտ ուժով ՍԴ մի շարք դատավորներից ազատվել, հիմա դրան զուգահեռ փորձում են առաջարկել կոմպրոմիսային տարբերակ՝ ընդունելով մի օրենք, որով կշահագրգռեն ՍԴ դատավորներին լքել պաշտոնը, եւ եթե սա արվեր պրն Քոչարյանի գործի հետ չկապված, ընդհանուր ինչ-որ նպատակների հետ կապված, դեռ կարելի էր քննարկել՝ լավ թե վատ մոտեցում է, եւ քննարկումների արդյունքում հավանաբար կգայինք նրան, որ սա լավագույն տարբերակը չէ, բայց այս դեպքում ամեն ինչից ակնհայտորեն երեւում է, որ այդ օրենքի նախագիծը ուղղակիորեն նպատակ է հետապնդում Քոչարյանի գործի հետ կապված ՍԴ-ում ստեղծել այնպիսի իրավիճակ, որ ՍԴ-ն չիրականացնի արդարադատություն»։

Անդրադառնալով այն հանգամանքին, որ ՍԴ-ն, կասեցնելով գործի վարույթը, խորհրդատվական կարծիք ստանալու համար դիմել է ՄԻԵԴ եւ Վենետիկի հանձնաժողով, Հայկ Ալումյանն ընդգծեց, որ այն ստանալուց հետո էլ ՍԴ-ն ինքը պիտի որոշում կայացնի, որովհետեւ հարցը քննարկվելու է նորմերի՝ Հայաստանի Հանրապետության սահմանադրությանը համապատասխանելու կամ չհամապատասխանելու համատեքստում. «Այս ոտնձգությունները ուղղված են նրան, որ մինչ համապատասխան կարծիքները գան, եւ ՍԴ-ում վարույթը վերսկսվի,ՍԴ-ն արդեն չունենա այն կազմը, որ ունի այսօր։ Հիշեք Ջհանգիրյանի երկու ամիս առաջ տված հարցազրույցը, որում նա ասել էր, որ ՍԴ-ն պրն Քոչարյանի գործը չի քննի, իսկ եթե քննի էլ, ապա ոչ այսօրվա կազմով, այսինքն՝ այս ամենը արվում է ոչ թե ընդհանուր նպատակներով, այլ հենց պրն Քոչարյանի գործով ինչ-որ նպատակների հասնելու համար։ Դրա մասին են վկայում նաեւ ճնշումների դինամիկան»։

Ալումյանն առաձնանցրեց օրենսդրական նախագծի այն կետը, որով նախատեսվում է «ՍԴ մասին» օրենքում կատարել փոփոխություն, ըստ որի՝ եթե ՍԴ դատավորը մեղադրվի որեւիցե հանցագործության մեջ, ապա նրա պաշտոնավարումը կդադարեցվի. «Այսինքն՝ հերիք է քննիչը որոշում կայացնի ՍԴ դատավորին որպես մեղադրյալ ներգրավելու մասին, նրա պաշտոնավարումը կասեցվում է, մինչեւ որ կպարզվի քննիչը ճիշտ էր թե ոչ։ Սա ամենակոպիտ միջամտությունը կլինի գործադիրի կողմից դատականի ներգործունեության վրա։ Բայց այսպես չպետք է լինի. գործադիրն ու օրենսդիրը իրենց պետք է հեռու պահեն դատական իշխանության գործերին միջամտելուց, եթե մենք ուզում ենք ունենալ իրավական պետություն»,-նշեց պաշտպանը։

Հեղինակ` Միլենա Խաչիկյան